Foto: Almaty qalasy baspasóz qyzmeti
2026 jyldyń 15 naýryzynda aýqymdy mediajoba – «Referendým – 2026» onlain marafony ótedi. Marafon saǵat 09:00-de bastalyp, túngi 00:15-ke deiin jalǵasady. Bul týraly Referendým – 2026 telegram arnasynda habarlandy, dep jazady Ult.kz.
15 saǵatqa sozylatyn tikelei efir el ómirindegi mańyzdy saiasi oqiǵanyń barysyn jan-jaqty qamtyp, referendým kúniniń negizgi sátterin, qoǵam pikiri men sarapshylar kózqarasyn kórermenge jedel ári zamanaýi formatta usynady.
Naýryznama onkúndigi aiasynda ótetin marafon – tek aqparattyq shara emes, qoǵamdaǵy ózekti máselelerdi talqylaityn, jańa ideialar men tehnologiialyq bastamalardy tanystyratyn biregei alań. Is-sharaǵa saiasi qairatkerler, qoǵamǵa tanymal azamattar, óz salasynda tabysqa jetken mamandar, óner men mádeniet ókilderi jáne startaperler qatysyp, el damýynyń mańyzdy baǵyttary jóninde pikir almasady.
Joba barysynda kórermender zamanaýi tehnologiialyq sheshimder arqyly usynylatyn erekshe kórinisterdi de tamashalai alady. Otandyq ónertapqyshtar jasaǵan robottar baǵdarlama júrgizýge qatysyp, gologramma-shoý arqyly elimizdiń sońǵy jyldardaǵy jetistikter shejiresi usynylady.
Marafon aiasynda 5 alań jumys isteidi. Sahnada qoǵam qairatkerleri, ónertapqyshtar, qaiyrymdy isimen tanylǵan azamattar óz oi-pikirlerin ortaǵa salyp, kontserttik baǵdarlama usynylady. Sarapshylar men qoǵam ókilderiniń qatysýymen ózekti taqyryptarǵa arnalǵan pikirtalastar ótip, innovatsiialyq jobalar men otandyq startaptar tanystyrylady. Sonymen qatar marafon barysynda qonaqtarmen blits-suhbattar júrgizilip, el aimaqtary men shetelden tikelei qosylymdar uiymdastyrylady.
Onlain marafon respýblikalyq jáne aimaqtyq buqaralyq aqparat quraldarynyń resmi saittary men áleýmettik jeli paraqshalarynda tikelei kórsetiledi.
