Foto: polisia.kz
Aqtóbe qalasynda iri kólemdegi urlyq deregi tirkeldi. Politsiia 15 million teńgege jýyq shyǵyn keltirgen qylmysty ashyp, kúdiktini ustady, dep habarlaidy Ult.kz.
Oqiǵa 5 naýryzǵa qaraǵan túni qaladaǵy dúkenderdiń birinde bolǵan. Aldyn ala málimetke sáikes, belgisiz azamat saýda nysanynyń kireberis esiginiń áinegin balǵamen syndyryp, ishke zańsyz kirgen. Keiin dúkennen 18 uialy telefondy alyp ketken.
Kásipkerdiń baǵalaýynsha, keltirilgen materialdyq shyǵyn shamamen 15 million teńgeni quraǵan.
Jedel-izdestirý sharalary barysynda tártip saqshylary kúdiktini anyqtap, kóp uzamai qolǵa túsirgen. Ol qala kósheleriniń birinde urlanǵan telefondardy satpaq bolǵan kezde ustalǵan.
Quqyq qorǵaý organdarynyń málimetinshe, tergeý barysynda barlyq urlanǵan telefondar tárkilengen. Qazirgi ýaqytta atalǵan fakti boiynsha sotqa deiingi tergep-tekserý júrgizilip jatyr. Kúdikti ýaqytsha ustaý izoliatoryna qamaldy.
