Almaty oblysyndaǵy bildei bir aýdan ortalyǵy Saryózekte sý joq, dep habarlaidy "Ult aqparat".
Halyq ishetin tirshilik nárin qaidan alaryn bilmeidi. Máseleniń ýshyqqany sonsha, turǵyndarǵa sýdy áskeriler kólikpen tasyp álek.
Al ákimdiktegiler Saryózektiń sý máselesin sheshý úshin qomaqty qarjy kerek dep otyr.
«Kúndizgi saǵat 14:00 beri kútip otyrmyz. Áne kelemiz, mine kelemiz deidi. Qazir saǵat túngi 23:00 boldy. Qashan Maqataev kóshesine sý keledi? Mynaý degen sumdyq boldy. Shái ishýden qaldyq, jýyný bylai tursyn», - deidi Saryózek aýylynyń turǵyndary.
Saryózektikter sý tasityn kólik osylai túnniń bir ýaǵyna deiin kelmeidi deidi. Tipti sý jetkizý úshin turǵyndar taksi jaldap, shyǵyndanýǵa májbúr.
«Taksimen keldim minekei. 2 myń teńge aqshasyn tóledim. Endi, mine, sýymdy alyp turmyn», - deidi Saryózek aýylynyń turǵyny Nurlan Baiǵabylov.
«Mine, bir jeti boldy, sý joq. Sý tasityn kólikter birde keledi, birde kelmeidi», - deidi aýyl turǵyny Saltanat Egeýbaeva.
Saryózek halqy qashanǵa deiin bótelkemen sý tasyp, ómir súretini belgisiz. Sebebi, jer astyndaǵy sý qubyrlary tozyp, keibiri jarty ǵasyrdan astam ýaqyttan beri jańartylmaǵan.
Sý sorý qondyrǵylary birinen soń biri isten shyǵyp jatyr. Mundaǵy sý máselesin sheshý úshin 1 mlrd teńgeden astam qarajat kerek.
«Jobasy ázirlengen. Qazir 1 mlrd 73 mln teńge qarajat qajet. Oǵan qajetti barlyq biýdjettik ótinim berilgen. Respýblikalyq biýdjetten qalai qarajat bólinedi, solai jumys bastalady. Qarajattyń bólinýine qarap otyrmyz», - deidi Kerbulaq aýdandyq turǵyn úi kommýnaldyq sharýashylyǵy bólimi basshysynyń mindetin atqarýshy Medet Sopbaev.
Saryózekte 14 myńnan astam halyq turady.
Qazir osy aýdan ortalyǵyndaǵy halyqtyń jartysynan kóbi ishetin sý tappai, sý tasityn kólikti tosyp, kún keship otyr.
