Foto: Videodan skrinshot
Eldegi eń qart turǵyn ulytaýlyq Túimegúl Temirbaeva 116-shy kóktemin qarsy aldy. Keiýana áli de shiraq. Ol kóp jasaýdyń syryn adal eńbek jáne jaqsy nietpen bailanystyrady, dep habarlaidy Ult.kz “Habar 24” arnasyna silteme jasap.
Ómir boiy aýyr jumystyń ortasynda júrgen ol qazir de bos otyrmaidy. Qurt jaiyp, úi tirligine aralasyp turady. Árkimniń peshenesine jazyla bermeitin ádemi qartaiý baqyty Túimegúl apaǵa buiyrǵan. Ol jubaiy Aiazbai Temirbaev ekeýi ómir boiy jylqy baqqan. Degenmen mal sońyndaǵy qara jumystan qajymaǵan. Aiazbai aqsaqal ǵasyrǵa jýyq jasap, 95 jasynda dúnieden ótken. Al jaqynda 116 jasqa tolǵan Túimegúl áje kózáineksiz ine sabaqtap, is tigedi. Qimyly da shiraq.
“100-den asyp bara jatyrmyn. Ólmei kele jatyrmyn. Balalarym aman bolsyn. Balalardyń aldynda ketsem dep júrmin”, – dedi Qazaqstandaǵy eń qart adam Túimegúl Temirbaeva.
Túimegúl ájeniń balalary "Osy kúnge sheiin ol kisiniń "Aýyrdym" degenin estimedik" deidi. Es bilgennen eńbekpen ósken jan qazir de qartaidym dep qarap otyrǵan joq. Nemerelerdiń qarsylyǵyna qaramai, úidiń tirligine de aralasady.
“Anda-sanda dalaǵa shyǵyp keledi. Kóbinese úide júredi. Biyl solai boldy. Oǵan deiin barlyq sharýaǵa jarap turǵan. Syrttyń sharýasyna, ishtiń sharýasyna. Qansha degenmen jasy keldi ǵoi. Teledidar kórip otyrady. Bizge tamaq istep qoiady”, – dedi ájeidiń kelini Raýshan Temirbaeva.
Túimegúl Temirbaeva qańtar aiynda 116 jasqa toldy. Onyń eldegi eń qart turǵyn ekenin Eńbek jáne halyqty áleýmettik qorǵaý ministrligi rastaǵan. Keiýana búginde Qyzyljar kentinde kenje ulynyń qolynda turady. Baýyrynan órgen 4 baladan 15 nemere, 25 shóbere súigen.
