Foto: QR OAM
Búginnen bastap elimizdiń barlyq óńirlerindegi 1000-ǵa jýyq mektep pen kolledjde «Zań jáne tártip» jobasy aiasynda quqyqtyq mádeniet sabaqtary bastaldy, dep habarlaidy Ult.kz.
Jobany aýqymdy engizý týraly sheshim Almaty oblysy Talǵar aýdanynda ótken pilottyq kezeńniń nátijesine súiene otyryp qabyldanǵan. Onda býlling pen quqyq buzýshylyqtardyń azaiǵany tirkelgen. Atap aitqanda, kiberbýlling 18%-ǵa tómendep, táýekeli tómen oqýshylar úlesi 31,9%-ǵa artqan, al erekshe baqylaýdy qajet etetin jasóspirimder sany 30%-ǵa azaiǵan.
Joba aiasynda Shymkentte 100-ge jýyq, Qaraǵandy oblysynda 190-nan astam, Pavlodar oblysynda shamamen 110 bilim berý uiymy qamtylǵan. Oqýshylarmen jumys isteýge quqyq qorǵaý salasynda tájiribesi bar 600-den astam tálimger tartylyp, sabaqtar eki aptada keminde bir ret ótkiziledi.
Bastama oqýshylardyń quqyqtyq mádenietin qalyptastyryp, quqyq buzýshylyqtyń aldyn alýǵa baǵyttalǵan. «Qazaqstan balalary» tujyrymdamasy sheńberinde joba kezeń-kezeńimen keńeitilip, balalarǵa qatysty zorlyq-zombylyqtyń aldyn alýdyń biryńǵai tásilderin qalyptastyrýǵa múmkindik beredi.
