Foto: Depositphotos
Qylmyskerler óz kiristerin zańdastyrý úshin jeke tulǵalardy belsendi túrde paidalandy, dep málimdedi QR Qarjylyq monitoring agenttiginiń baspasóz qyzmeti.
Baspasóz qyzmetiniń málimetterine qaraǵanda, agenttik qylmystyq kiristerdi zańdastyrý úshin 6,2 myń «drop-kartalardyń» paidalanylǵanyn anyqtady. Bul kartalar arqyly ainalymnyń jalpy somasy 24 milliard teńgege jetti.
«Droptar» - bul banktik kartalar men shottardy rásimdeý úshin qoldanylatyn jalǵan tulǵalar.
Internet-bankingke qashyqtan qol jetkizý úshin kásibi jylystaýshylar úshinshi tulǵalarǵa tirkelgen bailanys operatorlarynyń SIM kartalaryn paidalanǵan.
Kóbinese «drop-kartalar» esirtki saýdasy, kiberalaiaqtyq, zańsyz qumar oiyndar jáne basqa da qylmystyq áreketterge bailanysty shemalarda qoldanylǵan.
Is júzinde «droptar» dep atalatyndar halyqtyń osal toptaryna jatatyn adamdar boldy (jumyssyzdar, stýdentter, zeinetkerler jáne basqalar), olar qylmystyq shemalardaǵy rólderiniń barlyq saldaryn túsinbeidi.
Mundai kartalardyń ieleriniń 90%-dan astamy rezident emes tulǵalar bolǵan. Olar týraly aqparat sheteldik memleketterdiń quqyq qorǵaý organdaryna berildi.
Mundai zańsyz áreketterdiń aldyn alý úshin Qarjylyq monitoring agenttigi ýákiletti organdarmen birlesip kelesi sharalardy qabyldady:
- banktik kartalardy úshinshi tulǵalarǵa berý úshin ákimshilik jáne qylmystyq jaýapkershilikti kúsheitýge baǵyttalǵan zańnamalyq ózgerister bastamashylyq etildi;
- kúdikti shottardaǵy qarajatty «toqtatý» jáne qashyqtan banktik qyzmet kórsetýdi óshirý mehanizmi engizildi;
- bir klientke beriletin banktik kartalardyń sanyn shekteý jáne 10 nemese odan da kóp kartalary bar klientterge tekserister kúsheitildi;
- kúdikti operatsiialardy anyqtaý jáne kúmándi klientterdi qarjy monitoringiniń sýbektileriniń qyzmetterinen ajyratý úshin tipologiialar ázirlendi.
-Qurmetti azamattar, Qarjylyq monitoring agenttigi banktik kartalar men shottardy paidalaný arqyly zańsyz shemalarǵa qatysqany úshin jaýapkershilikke tartylý qaýpi bar ekenin eskertedi.
Kúmándi qarjylyq operatsiialarǵa qatysýdan saq bolýǵa shaqyramyz. Eger sizge qarajat aýdarǵanyńyz úshin jeńil tabys usynsa, bul qylmystyq shemanyń bóligi bolýy múmkin. Mundai jaǵdailarda barlyq bailanystardy toqtatyp, quqyq qorǵaý organdaryna habarlaýyńyz qajet.
Sizdiń saqtyǵyńyz ben muqiiattylyǵyńyz – eldiń qarjylyq qaýipsizdiginiń kepili!- delingen habarlamada.
Qarjylyq monitoring agenttigi 150 myńǵa jýyq aktsizsiz temeki satýshylardy quryqtaǵany jazdyq.
