Qazirgi ýaqytta Bilim jáne ǵylym ministrligi bilim júiesin tsifrlandyryp jatyr. Bul týraly Bilim jáne ǵylym ministrligi uiymdastyrǵan onlain brifingide aityldy, dep habarlaidy QazAqparat.
«Qazirgi ýaqytta Bilim jáne ǵylym ministrligi bilim júiesin, sonyń ishinde 1-synypqa qabyldaý júiesin tsifrlandyryp jatyr. Qujatty elektrondy túrde qalai tapsyrýǵa bolatynyn aityp óteiin. Egov.kz portalynda «Bilim» degen bólim bar. Ol birneshe baǵyt boiynsha bólingen. Elektrondyq qoltańbasy bar kez kelgen QR azamaty Egov.kz portalyna tirkelip, qujat tapsyra alady. Parolińizdi jazǵan soń jeke kabinetke kirip, qandai qyzmet túri kerek ekenin tańdaisyz. Odan keiin qai aýdan, qai mektep ekenin tańdap, qujattardy tirkeisiz. Bul qujattar QR Bilim jáne ǵylym ministrliginiń júiesine túsedi», - dedi Bilim berý tsifrlyq transformatsiialaý departamentiniń direktory Qanat Kenbai.
Ol 1 maýsym kúni 1-synypqa qabyldaýǵa 645 ótinim túskenin aitty.
«Al 1 maýsymnan búginge deiin jalpy ótinim sany – 1139. Ótinimder Bilim jáne ǵylym ministrliginiń júiesinde óńdeledi. Balany birinshi synypqa tikelei mekteptiń ózi qabyldaidy, iaǵni osy júiege mekteptiń ózi kirip, óńdeidi. Bul jerde Qazaqstandaǵy barlyq mektep kórsetilgen», - deidi ol.
