AQSh Ádilet ministrligi Kýbanyń burynǵy basshysy Raýl Kastroǵa syrttai aiyp taǵylǵanyn málimdedi, dep habarlaidy ult.kz.
94 jastaǵy Raýl Kastro men taǵy bes adam amerikalyq azamattardyń qazasyna jáne eki azamattyq ushaqty joiýǵa qatysy bar dep aiyptalyp otyr. Bul is 1996 jyly 24 aqpanda gýmanitarlyq uiymǵa tiesili AQSh-tyń eki ushaǵynyń atyp túsirilýine bailanysty qozǵalǵan.
Tergeý málimetinshe, ushaqtar Ońtústik Floridadan Kýba baǵytyna ushyp shyqqan. Tergeý nusqasyna sáikes, Raýl Kastronyń buiryǵymen Kýbanyń áskeri joiǵysh ushaqtary beitarap aýmaqta ushyp bara jatqan qarýsyz eki Cessna azamattyq ushaǵyna eskertýsiz zymyran atqan. Sonyń saldarynan AQSh-tyń tórt azamaty qaza tapqan.
AQSh Ádilet ministrligi Raýl Kastro men taǵy úsh aiyptalýshyǵa ólim jazasy nemese ómir boiyna sottalý qaýpi tónip turǵanyn habarlady.
Sońǵy ýaqytta Kýba men AQSh arasyndaǵy shielenis kúsheiip keledi. AQSh prezidenti Donald Tramp Kýbada bilik aýysýy keregin birneshe ret málimdedi. Bul elde kommýnister Fidel Kastro bastaǵan 1959 jylǵy revoliýtsiiadan beri bilikte otyr.
Reuters agenttiginiń málimetinshe, Tramp óz málimdemesinde Kýbany «sheteldik jaý áskeri kúshterine pana berip otyrǵan memleket» dep ataǵan.
Buǵan jaýap retinde qazirgi Kýba prezidenti Migel Dias-Kanel aral memleketi eshkimge qaýip tóndirmeitinin aitty.
Qazir Kýbada energetikalyq daǵdarysqa qatysty narazylyq ótip jatyr. AQSh-tyń Kýbaǵa qarsy sanktsiialary aiasynda janarmai tapshylyǵy kúsheigen soń elde jaǵdai kúrt nasharlaǵan.
Raýl Kastro - revoliýtsioner Fidel Kastronyń týǵan inisi. Ol 2011 jyly Kýba Kommýnistik partiiasy Ortalyq komitetiniń birinshi hatshysy bolyp sailandy. 2016 jyly bul qyzmetke ekinshi merzimge qaita sailanǵan.
2018 jyly Raýl Kastro Ministrler keńesi men Memlekettik keńes tóraǵasy qyzmetterinen ketti. Onyń ornyna Migel Dias-Kanel keldi. Al 2021 jyldyń sáýirinde Kastro Kommýnistik partiianyń birinshi hatshysy retindegi ókilettigin de tapsyrdy.
.jpg)