Қырғызстан президенті Сооронбай Жээнбеков (сол жақта) өзін ұлықтау салтанатында экс-президент Алмазбек Атамбаевтың қолын алып тұр. Бішкек, 24 қараша 2017 жыл.
Қырғызстанның қызметіне жаңа кіріскен президенті Сооронбай Жээнбеков экс-президент Алмазбек Атамбаевқа "Қырғыз Республикасының Батыры" атағын беру туралы жарлық шығарды. Президент аппаратының ақпараттық саясат бөлімінің хабарлауынша, Атамбаевқа мұндай атақ "елге сіңірген ерен еңбегі, Қырғызстанның мемлекеттік егемендігін, елдің бірлігін және өлкедегі тыныштықты нығайтуға, Қырғызстанның тұрақты дамуының негізін қалауға қосқан үлесі үшін, сонымен қатар саяси ерік пен ерлік көрсеткені үшін" берілген, деп жазады Азаттық.
Жээнбековтің жарлығы бойынша, Атамбаевқа "Ак шумкар" ерекше төс белгісі де тапсырылады.
Сооронбай Жээнбеков 24 қарашада қызметіне кірісу салтанатында сөйлеген кезінде президент ретіндегі алғашқы жарлығымен Алмазбек Атамбаевты ең жоғарғы мемлекеттік награда - "Ак шумкар" сыйлығымен марапаттайтынын айтқан.
Алмазбек Атамбаев сайлау алдында өзінің Социал-демократиялық партиясынан президенттікке кандидат болған Сооронбай Жээнбековке қолдау білдіріп, оны "досым" деп атаған.
2860 рет оқылды
