03 мам, 2022 сағат 09:45

БҚО-да теміржол қызметкерлері Президентке үндеу жасады

Фото: mgorod.kz/видео кадры

Батыс Қазақстан облысы Шыңғырлау кентіндегі теміржол қызметкерлері Президент Қасым-Жомарт Тоқаевқа үндеу жасады, - деп хабарлайды Tengrinews.kz агенттігі  "Мой город" басылымына сілтеме жасап.

Видео үндеуге сүйенсек, өткелдер бойынша кезекшілерді жұмыстан босату ауыр зардаптарға әкелуі мүмкін.

"2017 жылдан бері теміржол өткелдерін қарап келеміз. Орал - Нұр-Сұлтан бағытындағы "Тальго" жүрдек пойызы біздің теміржолмен өтеді. Биыл 13 мамырдан бастап өткел күзетін ұстаудың тиімсіздігіне байланысты бізді қысқартып жатыр. Бұл мәселеге араласуыңызды сұраймыз, өйткені басшылық бұл әрекет адамдардың өмірі мен денсаулығына қауіп төндіретінін түсінбейді. Өткелдегі кезекшілер жұмыстан босатылған жағдайда біздің басшылық жолаушыларға қауіп төндіреді. Теміржол өткелдерінен күнделікті көліктер мен малдар өтеді", - дейді олар видеода.

Видео 1 мамырда түсірілген. 2 мамырда Шыңғырлау ауданы әкімінің орынбасары Азамат Бисембаев бұл мәлімдеме бойынша жиын өткізгенін түсіндірді. Сондай-ақ, ҚТЖ қызметкерлері мен басшылығының бірлескен кездесуі жоспарланған.

Бисембаев бұл мәселені әкімдік бақылауға алды деп сендірді. Сондай-ақ, ол қызметкерлер қысқартылмайтынын, бірақ оларға балама жұмыс ұсынылуы мүмкін екенін айтты. Әкімінің орынбасары бірлескен отырыстан кейін толығырақ ақпарат беруге уәде берді.