Фото: Reuters
Ең жоғары баж салығы Қытай, Вьетнам және Камбоджадан әкелінетін тауарларға салынды, деп хабарлайды Ult.kz.
Трамптың айтуынша, АҚШ басқа елдердің америкалық тауарларға салған баж салығының жиынтық мөлшерлемесін есептеп, оның жартысына тең мөлшерде өз бажын енгізеді. Трамп көрсеткен кестеге сәйкес, Еуроодаққа – 20%, Тайваньға – 32%, Жапонияға – 24%, Қазақстанға – 27%, Оңтүстік Африкаға – 30%, Швейцарияға – 31% баж салығы енгізілді. Ұлыбритания, Мысыр, Түркия, Колумбия, Перу, Аргентина, Чили және Сингапур ең төменгі базалық баж салығын 10% мөлшерінде төлейді.
Сондай-ақ Трамп баж салығын нөлге дейін төмендетудің жолын ұсынды – ол үшін өнімді АҚШ-та өндіру қажет. Трамптың айтуынша, өзара баж салығы АҚШ үшін "алтын ғасырға" әкеледі, ал "жұмыс орындары мен зауыттар біздің елге қайта оралады".
Бұған қоса, АҚШ 3 сәуірден бастап жеңіл автомобильдерге, жеңіл жүк көліктеріне және автокөлік бөлшектеріне 25% баж салығын енгізеді.
Ақ үйдің Раушан бағында сөйлеген сөзінде АҚШ президенті былай деп мәлімдеді:
"Мен басқа елдерді кінәламаймын. Мен бұл апатты теңгерімсіздікке жол берген АҚШ-тың бұрынғы президенттерін кінәлаймын. Біз олардың тапшылығын жаптық, әскерлеріне қаржы бөлдік және бүкіл әлемге қамқор болдық. Бұл енді аяқталады".
АҚШ президентінің пікірінше, бұл ел экономикасының өсуіне әкеледі. Сонымен қатар Дональд Трамп елдерге баж салығын нөлге дейін төмендетудің жолын ұсынды:
"Егер сіз тарифтік мөлшерлемеңіздің нөлге тең болғанын қаласаңыз, өз өніміңізді дәл осы жерде, Америкада өндіріңіз".
769 рет оқылды
