16 қар, 2016 сағат 11:30

«Тәуелсіз Қазақстан» пойызы Тобыл бойына тоқтады

Қостанай жұрты Тәуелсіздігіміздің 25 жылдығы мерейлі тойы алдында республикалық акциямен елді бір аралап қайтуға жолға шыққан «Тәуелсіз Қазақстан» пойызының келетін күнін санап жүр еді.

Қарашаның қырық құбылған күніне қарамай ертемен қоста­най­лықтар, облыс, қала басшылары пойызды темір жол вокзалы­нан қуаныштың нышанындай сыр­найлатып-кернейлетіп күтіп алды.

Облыс әкімінің орынбасары Марат Жүндібаев қонақтарды еліміздің ең қасиетті өңірінің бірі – Қостанай жеріне келуімен құттықтады. «Жиырма бес жыл ішінде Қазақстанды бүкіл дүние жүзі таныды, Елбасымыздың сындарлы саясатының арқасында халықаралық беделді ұйымдарға мүше болдық. Біз Тәуелсіздікке сол үшін де қарыздармыз», деді ол.

Қазақстанда өндірілетін астықтың төрттен бірін беретін Қостанайдың қамырлылығы жоғары, алтындай бидайын дүниенің жартысы біледі десе, кім сенбейді?! Экспортқа шығарылатын ұнның да төрттен бірі Қостанайдан артылады. Биыл да облыс мол астық жинады. «Құтты қонақ келсе, қой егіз табады» деген сөздің жаны бар. Биыл он айда Қостанай облысында өндірілетін өнімнің физикалық көлемі соңғы бір жарым жылда бірінші рет 100 пайызды құрады. Ал облыс ұзақ жылдардан бері кеннің темір, асбест, боксит түрлерін өндіреді. Бірақ нарық жер астының байлығын шетке асыра бергеннен гөрі, өңдеу өнеркәсібін дамытқанда байитынымызды меңзеп отыр. Қазір Қостанай облысында өңдеу өнеркәсібі шикізат өндірудің алдына шықты. Бұл дамудың жақсы нышаны екені анық. Қостанайда «Toyota», «Ssang Yong» секілді әлемдік бренд автомашиналар құрастырылады. Қостанай еліміздегі машина жасау өндірісінің орталығына айналмақ.

«Тәуелсіз Қазақстан» пойы­зы­ның штаб жетекшісі, профессор Әміржан Әлпейісов Қос­танай жұртын алда келе жат­қан Тәуелсіздік мерекесімен құт­тықтады. Сонымен қатар, пойыз негізінен әлеуметтік мәселелерді нысана еткенін де айтты. Ай­нал­дырған екі аптаның ішінде пойыздың 271 мүшесі болды, оның ішінде салалар мамандары түрлі кеңестер береді, жетпістен аса дәрігер жергілікті жерлерде ауруларды қабылдады. Олар Қостанайда да іске шұғыл кірісті. Облыстық ауыл шаруашылығы басқармасында шаруалар мен диқандар мамандардан көптеген сұрақтарына жауап алды. Солардың арасында пойыздың Қоста­найда тоқтайтынын естіп, ат терлетіп Әулие­көл ауданынан келген шаруа қожа­лығының жетекшісі Бауыржан Райы­совты көп­тен бері жайылым туралы мә­селе ой­ландыратын. Ол пойызбен келген ма­мандардан нақты жауабын естіп кетті.

Жұмыспен қамтуды үйлес­тіру және әлеуметтік бағдар­ла­малар басқар­масында «Тәуел­сіз Қазақстан» пойызымен ми­нистрліктен келген өкілдерге кіру үшін жұрт кезекке тұрды. Со­лардың арасында Өзбекстаннан ата­жұртқа оралған, Рудныйда тұратын қан­дас ағайындар да төбе көрсетті. Тәуел­сіздік алған жылдардан бастап шетел­дегі қазақтардың атажұртқа көші тоқтаған жоқ. Алайда, олардың төлқұжат, азаматтық алуына байланыс­ты мәселелер әлі тиянақты шешімін таппағаны өкінішті. Өзбекстаннан келген ағайындарға бұрынғы төлқұжатын сол елдің Қазақстандағы елшілігіне апарып тапсыру, ықтиярхат алу мерзімі секілді мәселелер қиындық туғызып отыр. Осы мәселелерді айту үшін Нұриддин Бүкірбаев ақсақал мен Талғат Ахметов пойызға қуана, асыға жетті.

Облыстық «Қоғамдық келі­сім» үйінде өткен қоғамдық қабылдауға жергі­­лікті этнос­тар және зиялы қауым өкіл­­дері ке­ліпті. Оларды «Тәуелсіз Қазақ­­­стан» пойызының мүшелері тыңда­ды. Қостанайдағы белгілі арда­гер ұстаз Беген Көпешев осы по­йыздың құра­мында бар екенін естіп, Мәжіліс депу­таты, бел­гілі қаламгер Сауытбек Абдрах­­мановты әдейі іздеп келге­нін айтты. Ол кемеңгер ұстаз Ыбырай Алтын­саринге осы уа­қытқа дейін рес­публикада ла­йықты бір ескерткіштің жоқтығын мәселе етіп қойды. Дәрігер­лер денсаулықтарына бейжай қарамайтын қостанай­лық­тар­ды таңертеңнен кешке дейін қа­былдады. Пойызбен кел­ген дә­рі­герлерге барлығы 408 нау­қас қаралды, олардың 69-ы – бала. Дәрігерлер 56 адамға Астана­­дағы, Алматыдағы орта­лық кли­никаларға қаралу жөнін­де кеңес және жолдама берді, олардың арасында 19 бала бар.

Нәзира ЖӘРІМБЕТОВА,

«Егемен Қазақстан»

ҚОСТАНАЙ