11 қар, 2016 сағат 13:15

Студент те кәсіпкер бола алады

Қарағандыда біраздан айтылып келе жат­қан бизнес-инкубаторлар құру мәселесі ақыры оң шешімін табатын секілді. Тех­никалық және кәсі­би білім мәселелері жө­ніндегі аймақтық ке­ңесте жария болған бұл бастаманы сол кезде об­лыс әкімі Нұрмұхамбет Әбдібеков те қолдап, бі­лім беру, кәсіпкерлік және жастар саясаты бас­­қармаларына осы жобаны қолға алуды тап­сырды.

Алайда, жастарды тапсырма жүктел­ген жауапты орындардан бұрын биз­несмен­дер қолдауға ниет білдіріп, олар жа­қында колледж басшыларымен және бі­лім беруді дамытудың оқу-әдістеме­лік орталығы өкілдерімен кездесу өткізді.

– Кәсіпкер болғысы келетін жастар аз емес, бірақ соған жетудің жолын білмейді, – дейді оқу-әдістемелік орта­лығы директорының орынбасары Дана Асақаева. – Сондықтан, оларға мұндай жағдайда бизнес-инкубатор көмектесе алады. Бұл жоба қазіргі басты проблемалардың бірі – жұмыссыздық мәселесін шеше алар еді. Студенттер арасында кәсіпкерлікті дамыту жаңа жұмыс орындарын ашумен қатар, бизнес әлемінің жаңа көрнекті өкілдерін өмірге әкеледі деген үмітіміз бар.

Кездесуге Қарағанды облысы кәсіпкер­лер қауымдастығының президенті Ер­мек Әбілдин, сонымен қатар, Төлеген Әшімов, Степан Вадюнин, Қабдолла Бісмілдин сияқты жергілікті танымал кә­сіпкерлер қатысты. Іскер жандар да оқу орын­дарынан бизнес саласында лайықты із­басарлар шығатынына сенімді. Олар студент жас­тарды кәсіпкерлік жолына үйретіп, білген ақыл-кеңестерімен бөлісуге дайын.

Жұмысшы мамандықтарына оқыта­тын тех­никалық-құрылыс колледжінің ғимаратында өткен семинарға қатысқан­дардың дені – бұрынғы кәсіптік-техникалық училищелердің басшылары. Кәсіпкер, Қарағанды облыстық мәслихатының де­путаты Төлеген Әшімов айтқандай, қо­ғамдағы негізгі қозғаушы күш те бүгінгі жұмысшы және орта тап. Оның үстіне, көп нәрсе кәсіпорын инженерлері мен директорларына емес, жұмыскерлермен қоян-қолтық еңбек ететін бригадирлерге байланысты. Өйткені, өз кәсібінің қыр-сырын мейлінше жетік білетін солар.

– Біз бірінші кезекте қазір Қазақстан­ның ірі кәсіпорындарында жемісті жұмыс атқарып жүрген бұрынғы түлектерімізбен байланыс орнатуымыз керек. Студентті тәжірибеге, салиқалы іске тартуға бо­ла­тын-болмайтынын солар анықтай алады, – дейді Төлеген Әшімов.

Иә, өмір көрген, өмірдің тезін көрген ұстаздан тәлім алған шәкірттер ертең-ақ өз жолын табары анық. Соны осы жиында Кәсіпкерлер қауым­дастығының президенті Ермек Әбілдин де айтты.

– Студенттер бизнесін дамыту жұмыс­пен қамту мәселелерін де шешер еді, – дейді ол. – Оның үстіне, мемлекет бізге биз­неспен және жұмыспен қамтудың жол кар­талары түріндегі барлық мүмкіндікті жа­сап отырғанын естен шығармағанымыз абзал…

Ермек Төлеуұлы бұл жобаның қалай жұ­мыс істеуі қажеттігін де тәптіштеп өтті. Колледж басшыларынан керегі – са­бақ өткізу орындары, педагогтар мен студенттер. Ал жекелеген компания өкіл­дері оларға өз ақыл-кеңестерін, жөн-жо­ба­лары мен ұсыныстарын айта келеді. Олар жастарға бизнес-жоспар жасау амалдарын, алым-салықтың не екенін үйретіп, ең бастысы, жұмыс берушіге тәуел­ді болмау жолдарын түсіндірер еді.

Осы семинардың техникалық-құры­лыс коллед­жінде өткізілуі бекерден емес. Дәл осы оқу орнында әдеттегі жас­өс­пірімдермен қатар мүмкіндігі шектеулі жас өскіндер де білім алуда. Колледждің елу шақты студенті кембағал: бірінің құлағы естімесе, енді бірінің көру қабілеті төмен және басқадай. Әйтсе де, колледж директоры Светлана Балабекованың айтуынша, олардың қай-қайсысы да өз болашағының жарқын боларына сенеді. Колледжде бизнес-инкубатор құруды бұл кісі де қолдап отыр. Өйткені, ертең-ақ өте шығатын оқу мерзімінен соң, он екі мүшесі дін аман түлектердің өзі қайда барарын білмей тосылады.

Ұзын сөздің қысқасы, бизнес-инкубатор жасаудың қанатқақты жобасы осы техникалық-құ­рылыс колледжінде іске қосылатын болды. Мұнда оған керек жағдайдың бәрі де бар. Енді тек кәсіпкерлердің жан-жақты қолдауы ғана қажет.  Сәтін салса, қазақстандық бизнесте ұрпақтар сабақтастығы деген ұғым қалыпқа айналатын күн де туатын сияқты. Бұл, әрине, қоғам игілігіне қызмет етер үрдіс болар еді.

Қайрат ӘБІЛДИНОВ,

«Егемен Қазақстан»

ҚАРАҒАНДЫ