Оңтүстік Кореяның бірігу министрі Чо Мён Гён (сол жақта) мен Солтүстік Кореяның бейбіт бірігу комитетінің төрағасы Ри Сон Гвон қол алысып тұр. 9 қаңтар 2018 жыл.
Солтүстік Корея биыл 9-25 ақпан аралығында Пхенчханда өтетін XXIII қысқы Олимпиада ойындарына қатысатын болды. Пхеньян қысқы ойындарға спортшылармен қатар, жанкүйерлер және арнайы делегация жібереді. Бұл туралы Bloomberg және Reuters ақпарат агенттігі хабарлады.
Бүгін, 9 қаңтарда Пханмунджом шекара бекетінде Сеул мен Пхеньян арасында келіссөз басталған. Келіссөздің алғашқы күнінен кейін Солтүстік Корея тарабы олимпиадаға қатысатындарын мәлімдеді. Ал Оңтүстік Корея келіссөз кезінде олимпиаданың ашылу салтанатында бір команда ретінде шығуды, Корей соғысы кезінде ажырап қалған туысқандарды қайта қосуды ұсынған.
Оңтүстік Кореядағы олимпиада ойындары 9-25 ақпанда өтеді. Қазір Солтүстік Кореядан мәнерлеп сырғанаудан бір жұп жолдама алған. Қысқы ойындарға спортшыларды тіркеу аяқталып қойған. Бірақ Халықаралық олимпиада комитеті Солтүстік Корея спортшыларын тіркеуге дайын екенін мәлімдеді.
Естеріңізге сала кетейік, қос тараптың келісөздер тобына бес-бес адамнан кірген. Корея Республикасының делегациясын бірігу министрі Чо Мён Гён бастап келсе, КХДР жағына Кореяның бейбіт бірігу комитетінің төрағасы Ри Сон Гвон басшылық етеді.
25473 рет оқылды
