Фото: British Embassy in Kazakhstan
Бүгін Сенатта Qazaq Oxford Dictionary сөздігінің таныстырылымы өтті, - деп хабарлайды ҚазАқпарат агенттігі.
«Бұл — Президенттің тапсырмасымен Ұлттық аударма бюросы мамандары 4 жылдан астам уақыттың ішінде арнайы әзірлеген сөздік. Оны қазақ тілінің мәртебесін халықаралық деңгейге биіктететін, оның қуатын, тілдік айналыстағы, қолданыстағы әлеуетін көрсететін еңбек деп бағалауға болады. Мемлекеттік тілдің Oxford сөздіктерінің қатарына ілінуі, оған 60 мыңнан астам сөздік іріктеліп, ғылыми негізде берілуі — зор мәртебе. Бұл жұмысқа Ахмет Байтұрсынұлы атындағы Тіл білімі институтының ғалымдары зор үлес қосты», — деді Сенат депутаты Нұртөре Жүсіп сөздіктің таныстырылымында.
Іс-шара барысында жоба жетекшісі Халықаралық «Қазақ тілі» қоғамдық бірлестігінің президенті Рауан Кенжеханұлы сөздіктің қалай әзірленгендігіне тоқталды.
«Әлемде аударма сөздіктерді дайындау барысында, әсіресе өзге тілдерді ағылшын тілімен байланыстыруда ең беделді, ең тәжірибелі ұйым — Oxford баспасы. 150 жылдан бері сөздік дайындап, соған маманданған», — деді Рауан Кенжеханұлы.
Оның атап өтуінше, cөздік құрастыру аясында қазақ және ағылшын тілі лексикасындағы өзгерістер, әсіресе қазіргі мәдениет, ақпараттық технологиялар, медицина, экономика, қаржы мен сауда салаларындағы жаңалықтар ескерілді.
Сондай-ақ сөздікте ағылшын және қазақ тілдерінің грамматикасы мен дыбыстау, емле ережелері түсіндірілетін қысқаша нұсқаулықтар, қазақ тіліндегі іскерлік және электронды хат-хабар жазу үлгілері берілді.
286 рет оқылды
_140_110.jpeg)
