Семейде көлікке қыстырылып қалған екі адам құтқарылды, деп хабарлайды ҚазАқпарат.
ШҚО Төтенше жағдайлар департаменті баспасөз қызметінің мәліметіне сүйенсек, жол-көлік оқиғасы 20 қаңтарда түнгі сағат 01.00 шамасында Семейдегі Сәтбаев көшесінде болған.
Nissan Almera маркалы автокөлікті тізгіндеген жүргізуші рульге ие бола алмай қалды. Соның салдарынан көлік жыраға құлап, аударылып түскен.
«Жедел жәрдем қызметкерлері құтқарушыларға хабарласып, көлікте қыстырылып қалған екі адамды шығарып берулерін сұрады. Оқиға орнына шұғыл жеткен ТЖД қызметкерлері апаттық-құтқару құралдарының көмегі арқылы барынша сақтықпен автокөлікті көтерді. Содан соң зардап шегушілерді аман-есен шығарып, дәрігерлерге тапсырды», - деп хабарлады ведомство өкілдері.
927 рет оқылды
