Фото: ЖИ
Ресейдің Сыртқы барлау қызметі (СВР) Украина Қарулы күштері Ресей аумағына жаңа дрондық шабуылдар жасауға дайындалып жатқанын мәлімдеді, деп хабарлайды Ult.kz.
СВР баспасөз бюросының хабарлауынша, Киев билігі Еуропадағы саяси және қаржылық серіктестеріне Украина армиясының әлі де соғыс әлеуетін сақтап отырғанын және Ресей экономикасына соққы бере алатынын көрсетуге тырысып отыр.
Ресейлік барлау мәліметінше, Украина тек Балтық елдері арқылы әуе дәліздерін пайдаланумен шектелмей, ұшқышсыз аппараттарды осы мемлекеттердің аумағынан ұшыруды жоспарлап отыр. Мәлімдемеде мұндай тактика нысанаға жету уақытын қысқартып, шабуылдардың тиімділігін арттырады делінген.
СВР Латвия билігі бастапқыда Мәскеудің ықтимал жауап соққысынан қауіптенгенін, алайда Киевтің қысымынан кейін операцияға келісім бергенін атап өтті. Ресей тарапы украиналық тарап нақты ұшыру нүктесін анықтау мүмкін емес екенін алға тартқанын мәлімдеді.
Сонымен қатар, Ресей барлауы Украина Қарулы күштерінің ұшқышсыз жүйелер бөлімінің әскери қызметкерлері Латвия аумағындағы «Адажи», «Селия», «Лиелварде», «Даугавпилс» және «Екабпилс» әскери базаларына орналастырылғанын хабарлады.
СВР қазіргі заманғы барлау құралдары дрондардың нақты қай жерден ұшырылғанын анықтауға мүмкіндік беретінін айтып, қажет болған жағдайда шешім қабылдау орталықтарының координаттары белгілі екенін ескертті.
Сондай-ақ Ресей Сыртқы барлау қызметі НАТО мүшелігі «террористерге көмектескендерді» жауапкершіліктен қорғамайтынын мәлімдеді.
65 рет оқылды
