Петропавл сыртындағы айналма жолда жеңіл көлік пен жүк тиегіші бар трактор соқтығысып, машина жүргізушісі оқиға орнында көз жұмды, деп хабарлайды ҚазАқпарат.
Солтүстік Қазақстан облысы полиция департаменті баспасөз қызметінің мәліметінше, 13 ақпан күні сағат 10.00 шамасында Петропавл қаласы полиция басқармасына «Бармалей» мейрамханасы мен «Теплый канал» арасындағы айналма жолда ВАЗ-2114 автокөлігі мен жүк тиегіші бар SEM тракторының соқтығысқаны туралы хабарлама келіп түсті.
Жол-көлік оқиғасы салдарынан жеңіл көліктің 1984 жылы туған жүргізушісі оқиға орнында көз жұмды.
Бұл факті ҚР Қылмыстық кодексінің 345-бабы 3-бөлігі «Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы» бойынша Сотқа дейінгі тергеп-тексерудің бірыңғай тізіліміне енгізілді.
Сотқа дейінгі тергеу аясында полицейлер жол-көлік оқиғасының мән-жайы мен себептерін анықтауы қажет. Бірқатар қажетті сараптамалар тағайындалды.
СҚО жолдарында қаңтар айында 15 жол-көлік оқиғасы тіркеліп, салдарынан 6 адам қаза тауып, 20 адам жарақаттанды. Полиция қызметкерлері жол қозғалысының барлық қатысушыларын Жол жүрісі қағидаларын қатаң сақтауға шақырады.
574 рет оқылды
