Фото: Yonhap.com
Оңтүстік Кореяда елдің бұрынғы бірінші ханымы Ким Гон Хи акциялар бағасымен заңсыз манипуляция жасау, сайлау процесіне араласу және пара алу айыптарымен тұтқындалды, деп хабарлайды Ult.kz Yonhap агенттігіне сілтеме жасап.
Ким Сеулдегі Оңтүстік тергеу изоляторына жеткізіліп, қамауға алынды. Оның және күйеуі — бұрынғы президент Юн Сок Ёльдің бір мезетте түрмеге түсуі ел тарихында алғаш рет президенттік жұптың қатар қамауға алынуы болып отыр.
Арест ордері арнайы прокурор Мин Чжун Ги бастаған топтың сұрауынан бес күн өткен соң берілген. Тергеу мәліметінше, Ким капитал нарығы туралы заңды, саяси қорлар туралы заңды және парақорлыққа делдалдыққа тыйым салатын заңды бұзған.
Айыптау қорытындысында 2009–2012 жылдары Ким Оңтүстік Кореядағы BMW дилері — Deutsch Motors компаниясының акция бағасын манипуляциялау схемасына қатысқаны көрсетілген. Сондай-ақ ол 2022 жылғы қосымша сайлаулар мен 2024 жылғы парламент сайлауында кандидаттарды іріктеу процесіне ықпал еткені айтылады. Бұдан бөлек, Бірігу шіркеуінен бизнес қызметтері үшін қымбат сыйлықтар алған деген күдік бар.
16 қылмыстық іс бойынша айыптардың арасында Янпхён уезінде (Ким отбасының иелігінде жер бар) жылдам тас жолдың соңғы нүктесін өзгерту және сол аймақтағы тұрғын үй кешені құрылысы кезінде артықшылық алу әрекеттері де бар.
Бұған дейін тергеу кезінде Ким өз кінәсін мойындамай, барлық айыптарды жоққа шығарған. Дегенмен ол «ешкіммін» деп кешірім сұраған.
