Фото: senate.parlam.kz
ҚР Сенатының депутаты Нұртөре Жүсіп Алматы қаласындағы кітапханалар мен мұрағаттардың қызметкерлерімен кездесті. Онда АЭС құрылысы туралы алдағы референдум, атом энергетикасының келешегі мен еліміздің энергетикалық қауіпсіздігіндегі мән-маңызы талқыланды. Сондай-ақ, мемлекеттің тұрақты дамуы мен өркендеуіне ықпал ететін атом электр станциясының стратегиялық, экологиялық, экономикалық және ғылыми артықшылықтары туралы айтылды.
Нұртөре Жүсіп өз сөзінде Қазақстанның энергетикалық қауіпсіздігін нығайтуда атом энергетикасының әлеуеті зор екенін атап өтті. Уранның бай қорына ие және өзінің ядролық бағдарламасын дамытуда тиімді позицияда тұрған еліміздің жер қойнауынан алынатын отынға тәуелділікті азайтуға және энергетика саласын әртараптандыруға мүмкіндігі бар. Депутат атом энергетикасына салынған инвестиция Қазақстанның энергетикалық тәуелсіздігін айтарлықтай нығайта алатынын және булану газдары шығарындысын азайту есебінен орнықты даму мақсатына қол жеткізуге мүмкіндік беретінін атап өтті.
«Атом энергетикасының болашағы зор екені байқалып отыр. Бұрын күмәнмен қараған көптеген елдер қазір өз көзқарастарын қайта қарап, оны жаңартылатын энергия көздеріне маңызды қосымша деп санайды. Атом энергетикасы осы салада жоғары деңгейдегі қауіпсіздікті қамтамасыз етеді және сонымен бірге таза экологиялық шешім болып табылады. АЭС құрылысы елімізге өз электр энергиясын өндіруге мүмкіндік береді және барлық өңірді энергиямен қамтамасыз ету деңгейін арттырады. Бұл алға жасалған елеулі қадам болады. Атом энергиясы көмір мен газға қарағанда әлдеқайда қуатты, одан қалдық аз шығады және қоршаған ортаны қорғауға да жәрдемдеседі. Ол өңірлерді дамытуға және энергетикалық тәуелсіздігін нығайтуға ынталандыруға ықпал етеді», - деді Нұртөре Жүсіп.
Кездесуге қатысушылар атом электр станциясын салу кезінде заманауи технологияны қолдану, қалдықтарды кәдеге жарату, кадр әлеуетін қалыптастыру және станцияға қызмет көрсету үшін жаңа жұмыс орындарын ашу мәселелерін көтерді.
436 рет оқылды
