Қазақстан халқы Ассамблеясының XXIX сессиясында ҚР Тұңғыш Президенті Нұрсұлтан Назарбаев қазақ тілін меңгеруге талпынған адамдардың ұмтылысын ынталандыру керектігін айтты, деп хабарлайды "Ұлт ақпарат".
Мемлекеттік тілдің біріктіруші рөліне тоқталған Елбасы, «бүгінде қазақ этносының үлесі 70 пайыздан асады. Бұл процесс - барша әлемдегі табиғи құбылыс. Сондықтан қазақ тілін түсініп, меңгеруге деген талпынысты қолдап, барша жерде ынталандыруымыз керек», - деді.
Осы орайда Н. Назарбаев Қазақстан халқы Ассамблеясы бұл бағытта елеулі рөл атқарып келе жатқанын атап өтті. ҚХА жұмысы аясында өзге ұлт өкілдері қазақ тілін жақсы меңгеріп алды.
«Бұл бағыттағы талпынысты байқап отырмыз. Қаншама жастар Ассамблея атынан өмірге жолдама алды. Ассамблея айналасындағы жұмыс барысында мемлекеттік тілді меңгеруге мүмкіндік жасалды. Қазіргі кезде бұл адамдар жауапты қызметтерде жүр, бірнеше тілде емін-еркін сөйлей алады. Олардың әлеуметтік желілердегі парақшаларына кіріп, қазақтардың осы жігіттерді қалай жан-тәнімен жақсы көретінін көресіз», - деді Елбасы.
