_48_48.webp)
Фото: e-history.kz
Наурыз – көктемнің келуін білдіретін ең көне мейрамдардың бірі. Бұл күн шығыс халықтары үшін жаңа жылдың бастауы саналады. Қазақстанда мереке жыл сайын 21–23 наурыз аралығында атап өтіледі. Дәл осы уақытта күн мен түн теңеліп, табиғат жаңарады, деп жазады Ult.kz.
Наурыздың тарихы мыңдаған жылдарға созылады. "Наурыз" сөзі парсы тілінен аударғанда "жаңа күн" деген мағынаны білдіреді. Бұл мереке Қазақстан аумағында ғасырлар бойы тойланып келгенімен, кеңестік кезеңде оған 62 жыл бойы тыйым салынды. Тек 1988 жылдан бастап Наурыз қайта жаңғырып, тәуелсіздік алғаннан кейін ресми ұлттық мерекеге айналды.
Бүгінде Наурыз – тек демалыс емес, ұлттық құндылықтарды жаңғыртатын маңызды күн. Соңғы жылдары мереке 14–23 наурыз аралығындағы Наурызнама кезеңімен аталып өтуде. Әр күн белгілі бір құндылыққа арналған: көрісу, қайырымдылық, ұлттық дәстүр, шаңырақ, ұлттық киім, жаңару, ұлттық спорт, ынтымақ және жыл басы.
Наурыздың басты дәстүрлері – Наурыз көже дайындау, үйді тазалау, қонақ күту, ұлттық ойындар өткізу және үлкендердің батасын алу. Бұл күні адамдар реніштерін ұмытып, бір-бірімен татуласуға тырысады.
Қысқасы, Наурыз – жай мереке емес. Бұл – қазақтың ғасырлар бойы сақтап келген Жаңа жылы. Егер біз оны тек демалыс күндерімен шектесек, оның шынайы мәнін өзіміз жоғалтып алуымыз мүмкін.
_80_80.jpg)