Көк теңіз жағасындағы алтын құмды аймақ, байтақ даласы табиғаттың сұлу көріністері мен тарихи-мәдени ескерткіштердің небір жәдігерлеріне сыңсыған Маңғыстау өңірі туризмді дамытуға қолайлы мекен саналады. Туризмді дамыту арқылы экономиканы көтеру және өзге елдерге танылу басымдыққа ие болғалы өңірдің туризміне қатысты сан алуан пікірлер айтылып келеді. Осы орайда Маңғыстау облыстық туризм басқармасы атқарып отырған жұмыстарға үңілген едік.
– Маңғыстау өңірінің тамаша табиғатына зор қызығушылық танытып, түбектің тылсым түкпіріне саяхаттауға қызығушылық танытушылар жылдан жылға артып келеді, – дейді облыстық туризм басқармасының бастығы Гүлжан Байжауынова. – Салыстырмалы түрде айтар болсақ, мұнайлы түбекке туристік мақсатпен келушілер саны былтырмен салыстырғанда, биыл екі есеге көбейді. Бұған ең басты себеп ретінде Қазақстанның 19 ел үшін визасыз режім енгізуін және жыл басында қабылданған бағдарламаны айтар едім. 2016 жылы туризм басқармасы «Даму» кәсіпкерлікті дамыту қоры» АҚ-пен ынтымақтастық жөніндегі меморандумға қол қойды. Меморандум аясында облыс әкімдігі тарапынан жергілікті бюджет қаражаты есебінен 300 млн теңге, «Даму» кәсіпкерлікті дамыту қоры» АҚ-тан 600 млн теңге қаржы бөлініп, ол кәсіпкерлерді қаржылай қолдауға бағытталды.
Бүгінгі күнге дейін аймақ координациялық кеңесінде 35 жоба қаралып, жалпы құны 417 млн теңге тұратын 5 жоба мақұлданған. Олардың арасында теңіз жағалауындағы сауықтыру-көңіл көтеру аквапарк кешенінің құрылысы, теңізге экскурсия-серуен туры, серуен катерін жалға беру және қазақ ұлттық асүйі құрылыстары бар. Бұл жобалар іске қосылғанда, 93 жаңа жұмыс орны ашылады екен. Сондай-ақ, тағы 5 жоба екінші деңгейлі банктер қарауында жатыр. Банктер қаржыландырған жағдайда сауықтыру лагерінде демалатын балалар саны 214-тен 450-ге дейін өспекші. 2016 жылы «Aktau City & Mangystau Tours» жобасының тұсауы кесіліп, Ақтау қаласы мен Маңғыстау өңірінің көрікті және тарихи орындарына туристерді автобуспен жүйелі түрде апару жүзеге асырыла бастады. Ал Көгез жеріндегі этноауыл жобасына Прибалтика, Қытай, Италия, Жапония, Германия, Ресей елдерінен 90 шамалы турис тартылған.
– Өңірде қолға алынған медициналық туризмінің бағыты жаман емес. «Софи Мед Групп» көп салалы клиникасында елдің сан түкпірінен әрі шетелдік науқастар ем алуға ынталы, – дейді Гүлжан Маңғыстауқызы. – Сапалы медициналық қызметтің оң имиджін қалыптастыру, туристер талғамы мен таңдауына, сұранысына сай жоғары деңгейлі қызмет көрсету ішкі туризмнің тұрақты дамуына серпін береді. Соған орай, алда Ақтау қаласының теңіз жағалауында бес жұлдызды емдік-диагностикалық және сауықтыру кешені құрылысы қолға алынады. Өңірлік туризм өрісі кеңеюі үшін туристік қызмет құны қолжетімді болуы шарт. Дәмханалар мен хостелдер, яғни арзан әрі шағын қонақүйлердегі қызмет көрсету құны көпшіліктің қалтасы көтере алатындай болғаны жөн. Биыл Ақтауда екі хостелдің құрылысы аяқталып, пайдалануға берілді. Ішкі туризмді дамытуда жолаушыларды әуе көлігімен тасымалдау құнын азайту мәселесі бар. Басқарма тарапынан министрлікке «Шымкент-Ақтау» мен «Көкшетау-Ақтау» және «Қызылорда-Ақтау» бағыты бойынша әуе тасымалы тарифтерін субсидияландыру ұсынысы жолданды. Ұсыныс мақұлданған жағдайда, 2017 жылға арналған өңір бюджетіне өзгерістер енгізіледі.
Маңғыстауға биыл Швейцариядан туристік чартерлік пойыз келіп, туризмді дамыту аясында автожолдарды күрделі жөндеу әрі салу жұмыстары жүргізіле бастады. Осының аясында экскурсовод-гид қызметкерлерін даярлау жобасы қолға алынды.
Гүлайым ШЫНТЕМІРҚЫЗЫ,
«Егемен Қазақстан»
Маңғыстау облысы
2575 рет оқылды_140_110.webp)
