ҚР ІІМ Ішкі және сыртқы коммуникациялар департаментінің директоры Алмас Садубаев Қарағандыдағы төбелестің себебін айтты, деп хабарлайды ҚазАқпарат.
«Қарағандыдағы «Ежелгі Рим» мейрамханасындағы оқиғаға тоқталсақ, 31 желтоқсаннан 1 қаңтарға қараған түнде, яғни сағат 4 кезінде қонақтар музыканы өшірмеу туралы талап қойған. Сол себептен араларында (мейрамхана иелерімен) ерегіс басталып кеткен. Осыдан кейін олар (қонақтар) далаға шығып, өз достарына хабарласып, сол жерге басқа да азаматтарды шақырған. Қаза тапқан адам аталған мейрамханада отырмаған, яғни сырттан келген. Арадағы жанжалдың салдарынан төбелес болып, жараланған төрт адамның бірі көз жұмды», - деді А. Садубаев Орталық коммуникациялар қызметінде.
Осы орайда А. Садубаев бұл мәселеде ешқандай ұлтаралық қақтығыс жоқ екенін атап өтті.
«Осыған дейін ақпарат берген болатынбыз. Қазіргі кезде 8 адам қамауда отыр. Бұл мәселеде кінәлілер жазаға тартылатын болады, өйткені қылмыс жасағанның бәрі бірдей. Оқиғаның мән-жайы тергеу амалдары кезінде анықталады», - деді А. Садубаев.
Бұдан бұрын хабарланғандай, Қарағандыдағы кісі өліміне қатысты 8 күдікті тұтқындалды.
2031 рет оқылды
_140_110.webp)
