Парламент Сенатының жалпы отырысында «Суға батып кеткен кемелерді жою туралы 2007 жылғы Найроби халықаралық конвенциясын ратификациялау туралы» Заңы қабылданды, деп хабарлайды ҚазАқпарат.
Конвенция Халықаралық теңіз ұйымының бастамасымен қабылданған және Конвенцияға 53 мемлекет қосылды.
Конвенцияның негізгі мақсаты - суға батқан кемелерді тез әрі тиімді алып шығары, апат салдарын жоюдың бірыңғай қағидалары мен рәсімдерін енгізу.
«Конвенцияда теңіз апаты кезінде болған залалды қаржылай өтеуді кепілдендіру бойынша кеме иесінің және жүзгенде туы көтерілген мемлекеттің міндеттері бекітілген. Құжатты ратификациялау қажеттілігі Каспий теңізінде кеме қатынасының артуына байланысты туындап отыр. Бұл ретте, Қазақстан - негізгі жүк құраушы мемлекет. Каспий теңізінде жалпы жүктің 31 пайызы Ақтау және Құрық порттарында тиеледі. Сонымен қатар, 2020 жылы Иранның Каспий жағалауындағы порттарымен жаңа автомобиль-паром қатынасы ашылды және тұрақты контейнерлік желі іске қосылды», - деді ҚР Индустрия және инфрақұрылымдық даму министрі Бейбіт Атамқұлов.
Осы орайда ол еліміз Транскаспий халықаралық көлік дәлізін белсенді түрде дамытып отырғанын атап өтті. Жалпы алғанда, 2025 жылға қарай Қазақстанның порттары арқылы жүк көлемін 10 млн тоннаға дейін (2020 жылы – 5,4 млн тонна) жеткізу жоспарланып отыр.
«Осы жағдайда порттарға кіретін кемелер саны екі есеге ұлғаяды. Тиісінше теңіз апаттарының болу тәуекелі артады. Конвенцияны ратификациялау теңіз апаттары болған кезде Қазақстанның мүдделерін қорғау үшін қажетті жағдайлар жасайды. Біріншіден, еліміздің суларына кіретін кеме иелерінің өз жауапкершілігін сақтандыру немесе суға батқан кемені алып шығару міндетін белгілейді. Бұл Қазақстанға кемені көтеру шығындарын өтеуді тікелей сақтандыру компаниясынан талап етуге мүмкіндік береді. Екіншіден, туын көтеріп жүзетін мемлекеттің теңіз әкімшілігінен кемені көтеру және апат салдарын жою міндеттерін орындауды сақтандыру туралы куәлік түрінде кепілдік алады. Үшіншіден, теңіз апаты болған жағдайда Қазақстанның теңіз әкімшілігінің, кеме иесінің және шетелдік кеменің теңіз әкімшілігінің іс-қимыл тәртібін анықтайды. Конвенцияны ратификациялау қосымша бюджет қаражатын қажет етпейді», - деді Б. Атамқұлов.
661 рет оқылды
