БҰҰ Қауіпсіздік кеңесінде Ауғанстандағы ахуал бойынша ашық пікірталастар өтті, деп хабарлайды "Ұлт ақпарат" СІМ баспасөз қызметіне сілтеме жасап.
Бұл отырыста баяндамашылар ретінде Ауғанстанға көмек көрсету жөніндегі БҰҰ миссиясының басшысы Тадамичи Ямамото, БҰҰ Есірткі және қылмыс бойынша басқармасының Атқарушы директоры Юрий Федотов, БҰҰ ҚК 1988 «Талибан/Ауғанстан» бойынша санкциялық комитетінің төрағасы Қайрат Омаров, сондай-ақ Ауғанстандағы Бейбітшілік бойынша Жоғары кеңсесінің мүшесі Ваджма Фрог сөз сөйледі.
Сонымен қатар, БҰҰ Қауіпсіздік кеңесінің мүшелері және басқа да мүдделі мемлекеттердің өкілдері өз баяндамаларын жасады.
Қатысушылар Ауғанстандағы қиын жағдайды, соның ішінде террористік әрекеттер санының өсуін, солтүстік аймақтарда ДАИШ жауынгерлерінің көбейіп, елдегі есірткі өндірісінің қанат жаюын талқылап өтті. Сонымен қатар, Ауғанстан Үкіметі мен халықаралық қоғамдастықтың елдегі жағдайды тұрақтандыру жөніндегі шаралардың, ұлттық татуластыру, экономикалық даму, әйелдердің құқықтарын қорғау және ілгерілету, алдағы екі жылда президенттік және парламенттік сайлауды сапалы дайындау және өткізу бойынша мәселердің маңыздылығына ерекше көңіл аударылды.
Көптеген мемлекеттер өз сөздерінде БҰҰ Қауіпсіздік Кеңесіндегі Орталық Азиядан шыққан алғашқы мүшесі саналатын Қазақстанға оның Ауғанстан мен Орталық Азия аймағындағы қауіпсіздікті қамтамасыз ету мәселелеріне айрықша назар аударғаны үшін өз алғыстарын білдірді. Олардың пікірі бойынша, мұндай іс-шаралар аталған өңірде қалыптасқан жағдайды тереңірек түсінуге септігін тигізеді.
Қазақстандық делегациясының пікіріне қарағанда, мемлекеттер арасындағы тығыз аймақтық экономикалық ынтымақтастық ауған азаматтарының бейбіт әрекеттерге қатысуына ықпал етіп, қарулы топтарға және есірткі өндірісіне қатысуын азайтатын болады. Бұл елдегі және тұтастай алғанда, аймақтағы қауіпсіздік жағдайына оң әсерін тигізеді.
Қ. Омаров Қазақстанның өңірлік интеграцияның тұрақты жақтаушысы болып табылатынын және көліктік инфрақұрылымға инвестиция салып, Ауғанстанға гуманитарлық көмек көрсетіп келгенін атап өтті.
Отырысқа қатысушылар халықаралық қоғамдастықтың Ауғанстанның бейбітшілік пен гүлденуге қол жеткізуіне жәрдемдесуге қолдан келгенді аямайтындығын жеткізді.
2030 рет оқылды
