04 мам, 2021 сағат 12:00

Ішкі істер министрлігі көші-қон саласы бойынша 23 халықаралық келісімге қол қойды

ҚР ішкі істер министрлігі өткізген тікелей эфирде ҚР Парламенті Мәжілісінің жалпы отырысында Ішкі істер министрі Ерлан Тұрғымбаев депутаттардың назарына «Қазақстан мен Әзербайжан арасындағы көші-қон саласындағы ынтымақтастық туралы келісімді ратификациялау туралы» заң жобасын ұсынғаны туралы айтылды, деп хабарлайды ҚазАқпарат.

«Бұл заң жобасы екі елдің бір-бірімен статистикалық деректер мен ақпарат алмасуына, заңсыз көші-қон мәселелерін шешуге, қос азаматтықпен күресуге, тәжірибе бөлісіп, жұмыста практикалық көмек көрсетуге мүмкіндік береді. Сондай-ақ, Қазақстан мен Әзербайжан азаматтарының құқықтық мәртебесі анықтауды қарастырады», - дейді ҚР ІІМ ресми өкілі Нұрділдә Ораз.

Ерлан Тұрғымбаев қазіргі таңда Қазақстан мен Әзербайжан арасындағы ынтымақтастықтың артқанын, 2018 жылы жылы Қазақстанға Әзербайжаннан 50 мыңға жуық азамат, 2019 жылы – 48 мыңнан астам азамат келгенін, ал Қазақстаннан Әзербайжанға 2018 жылы 28 мың, 2019 жылы 29 мың азамат барғанын және бұл санның соңғы уақытта азаюуына тек пандемия әсер еткенін атап өткен.

«Сондықтан екі ел арасындағы көші-қон мәселелері бойынша ынтымақтастықтың әлеуеті жоғары. Бүгінгі таңда, Ішкі істер министрлігі бұдан басқа көші-қон саласы бойынша 23 халықаралық келісімге қол қойған. Халықаралық деңгейде тағы 8 келісім дайындалуда», - дейді ол.