23 қаң, 2021 сағат 06:00

Елордада өткен жылы 7 млн-нан астам мемлекеттік қызмет көрсетілді - әкімдік

Нұр-Сұлтанда өткен жылғы цифрландыру бағытындағы жұмыстарың нәтижелері белгілі болды, деп хабарлайды "Ұлт ақпарат" елорда әкімдігінің баспасөз қызметіне сілтеме жасап.

2020 жылы елорданы «Ақылды қалаға» айналдыруға бағытталған жобаларды іске асыру бойынша үлкен жұмыс атқарылды. Мәселен, өткен жылы мемлекеттік қызмет 100% онлайн форматқа ауыстырылды, ал «iQala» орталығы тәулік бойғы режимде 151 қызметті тікелей ұсынады. Қазіргі уақытта қала әкімдігі 159 түрлі мемлекеттік қызмет көрсетеді. 2020 жылы 7 млн-ға жуық қызмет көрсетілді, оның ішінде 6 млн-нан астамы — электрондық форматта. 

Сондай-ақ, әкімнің тапсырмасына сәйкес елорда әкімдігі жанынан цифрландыру бойынша IT-кеңес құрылды, оның аясында халықтың тыныс-тіршілігін жақсарту үшін IT-шешімдер енгізілді.

Қала тұрғындарының қауіпсіздігі мақсатында 2020 жылы «Қауіпсіз қала» ілкі жобасы іске қосылды. Бүгінде бұл жоба іске асырылу сатысында тұр. 

Айта кету керек, 2020 жылдың негізгі нәтижелерінің бірі — Нұр-Сұлтанның зияткерлік көлік жүйесі IDC халықаралық компаниясының нұсқасы бойынша Еуропа, ТМД және Орталық Азия елдері арасында көшбасшы болды.

2021 жылға қаланы цифрлық жаңғырту бойынша бірқатар стратегиялық міндет белгіленді:

1. Әкімдіктің IT-архитектурасын әзірлеу. Сәулет цифрлық трансформацияны жүргізу және әкімдік қызметі үшін мемлекеттік органды ақпараттандырудың ағымдағы және жоспарланатын жай-күйінің сипаттамасын қамтитын болады. 

2. Тұрғынның бірыңғай картасы жобасын іске асыру әлеуметтік салаға бағытталған бюджет қаражатын жұмсаудың тиімділігін арттыруға мүмкіндік береді. Мысалы, жеңілдіктер алушы көлік, дәріханалар, дүкендер, ТКШ, мектептер, балабақшалар санаттары бойынша белгілі бір қызметтерге ақы төлей алады. Сондай-ақ мемлекеттік қызметтердің сапасын арттыру, әртүрлі басқару органдарының автоматтандырылған жүйелерінің интеграциясы мен өзара іс-қимылын қамтамасыз ету.

3. Ақпараттық қауіпсіздіктің жедел орталығы. Нұр-Сұлтан қаласы әкімдігінің электрондық ақпарат ресурстарын, ақпараттық жүйелерін, телекоммуникация желілерін және басқа да ақпараттандыру объектілерін қорғау жөніндегі қызметті жүзеге асыратын болады.

4. «Ақылды шлагбаум» жобасын дамыту. 2020 жылы бірнеше ілкі жоба іске қосылды, олардың бірі – «Ақылды шлагбаум». Арнайы жүйе тәуліктің кез келген уақытында жедел жәрдем және басқа да жедел әрекет ету қызметтері үшін шлагбаумдардың автоматты түрде ашылуын қамтамасыз етеді. Биыл осы бағыт бойынша жұмыстар жалғасады.