Фото: Freepik
Жеке тұлғалар үшін банкроттық процедурасы жеңілдетілуі мүмкін. Бұл туралы вице-премьер – қаржы министрі Ерұлан Жамаубаев мәлімдеді, деп хабарлайды Sputnik Қазақстан.
"Жекелеген борышкерлер кейбір кедергілердің салдарынан банкроттық рәсімін қолдана алмай отыр. Осыған байланысты бірқатар норма ұсынылады", - деді Жамаубаев парламенттік тыңдауда.
Банкроттық процедурасын оңайлату үшін ұсынылып отырған шаралар:
• соттан тыс банкроттыққа жататын қаржы ұйымдарының тізбесін кеңейту;
• азаматтарды соттан тыс банкроттық рәсімін қолдану туралы өтінішке қосымша құжаттар беруден босату;
• төлем қабілеттілігін қалпына келтіру рәсімін қолдану үшін негіздерден өтініш берушінің 12 ай ішінде кредиторлар алдында өтеудің болмау фактісін растауды алып тастау;
• төлем қабілеттілігін қалпына келтіру жоспары бекітілгеннен кейін борышкердің шетелге шығуына тыйымды алып тастау.
Министрдің айтуынша, биыл 3 наурыздан бастап банкроттық бойынша 68 мыңнан астам өтініш келіп түскен. Оның 55 мыңы банкроттық рәсімге сәйкес келмейтіні анықталды.
Негізгі себептері: мүліктің болуы, борышкердің қарыз сомасы мен төлем мерзімі бойынша сәйкессіздік және кредитормен борышты дұрыс реттемеу.
"Нәтижесінде бүгінгі таңда 8 млрд теңгеден астам борыш сомасына 5,6 мыңға жуық азамат банкрот деп танылды", - деді вице-премьер.
Сот арқылы банкроттық және төлем қабілеттілігін қалпына келтіру рәсімін қолдану үшін соттарға 1 200-ге жуық азамат жүгініп, банкроттыққа қатысты 35 шешім шығарылды.
366 рет оқылды
