15 қыр, 2023 сағат 10:51

Банк қызметкерлеріне жалған ақша берген ерлі-зайыптылар сотталды

Фото: Kerem Uzel / Bloomberg

ҚМА Шымкенттегі департаменті қаланың екі тұрғынына қатысты 4000 еуро сомасында жалған ақша (номиналы 500 еуро банкноталар) сату фактісі бойынша істі аяқтады, деп хабарлайды "Ұлт ақпарат" Қаржылық мониторинг агенттігіне сілтеме жасап.

Бұған дейін, 2021 жылы қала банктерінің бірінің қызметкерлері алдын ала сөз байласу арқылы банк клиенттеріне жалпы сомасы 4 000 еуро жалған ақша купюраларын сатқан.

Аталған факт бойынша тергеу жүргізілді, оның нәтижелері бойынша банктің 5 қызметкері кінәлі деп танылып, 5 жылға бас бостандығынан айырылған болатын.

"Ал банк қызметкерлеріне жалған купюралар берген азамат халықаралық іздеуге жарияланған. Ол ағымдағы жылдың наурыз айында Швецияда ұсталып, Қазақстанға экстрадицияланды.

Маусым айында күдікті мен оның жұбайына қатысты іс сотқа жіберілді.

Сот үкімімен аталған адамдар кінәлі деп танылып, оларға 5 жыл мерзімге бас бостандығынан айыру жазасы тағайындалды" - делінген хабарламада.

Қаржылық мониторинг агенттігі азаматтарды сақтық танытуға және қолма-қол ақшаны мұқият қайта санап алуға шақырады.

Егер сіз жалған ақша тапсаңыз, ең бастысы - оны сатуға тырыспаңыз.

ҚР ҚК 231-бабына сәйкес, өз қаражатын қайтарып алуға деген ұмтылыс қылмыстық жауапкершілікке алып келуі мүмкін.