Алматы тұрғындары QR төлемді қолдануда көш бастап тұр. Бұл туралы «Азаматтарға арналған үкімет» мемлекеттік корпорациясында мәлім етті, деп хабарлайды ҚазАқпарат.
Ведомствоның дерегінше, 2021 жылы «Азаматтарға арналған үкімет» мемлекеттік корпорациясы Kaspi және Halyq Bank-пен бірлесіп, ХҚО-ларда мемлекеттік бажды QR көмегімен төлеу сервисін енгізді. Бір жыл ішінде қазақстандықтар QR кодты 700 мыңнан астам рет сұратып, 2,8 млрд теңгеден астам сомаға төлем жасаған.
«Сервис енгізілген сәттен бастап бөлімдердегі кассалар жүктемесі төмендеді. Клиенттер уақытын үнемдеп, оператордың алдында отырып-ақ қызмет ақысын төлейді әрі QR код арқылы төлем жасалғанда комиссия алынбайды», - деді «Азаматтарға арналған үкімет» мемлекеттік корпорациясы Алматы қаласы филиалы директорының орынбасары Әсем Болатбекова.
QR төлемді белсенді қолданғандардың ішінде Алматы қаласының (72 052) тұрғындары көш бастап тұр, екінші орында қарағандылықтар (63 278), одан кейін тізімде астаналық тұрғындар (54 354).
QR кодтың көмегімен мемлекеттік қызметтердің баж алымын ең аз төлегендер Атырау (23 080) мен Солтүстік Қазақстан облысының тұрғындары (23 449).
Еске салсақ, Мемлекет басшысы 2021 жылғы Жолдауында мемлекеттік қызметтерді алу кезіндегі проблемаларға назар аударып, бұл процестерді толығымен цифрландыруды тапсырған болатын.
Сондай-ақ, «Азаматтарға арналған үкімет» мемлекеттік корпорациясы келтірген дерекке сәйкес, QR код арқылы төлем жасау сияқты сервистер азаматтардың мемлекеттік қызметтерді алу ретін жеңілдетуге көмектеседі.
Қазір QR кодтың көмегімен 146 түрлі мемлекеттік қызметтің ақысын төлеуге болады. Болашақта бұл тізім толықтырылатын болады.
Айта кетейік, QR код арқылы мемлекеттік баж алымын төлеу Kaspi және Halyq Homebank мобильді қосымшалары арқылы қолжетімді.
702 рет оқылды
