5 қаңтарда шоқпар, дыбыстық граната және арматурамен қаруланған 500-ге жуық адам ҰҚК Шекара қызметі Алматы облысы бойынша департаментінің ғимаратын басып алмақ болды, деп хабарлайды "Ұлт ақпарат" Ұлттық қауіпсіздік комитетінің баспасөз қызметіне сілтеме жасап.
Периметр бойымен орналасқан бейнекамераларды істен шығарған шабуылшылар ғимарат ішіндегі қаруға қол жеткізуді көздеген. Алайда департамент нысандарын қорғауға қалған шекарашылар жеке құрамның күшімен оларды ығыстыра алған.
Сағат 14:00 шамасында қарулы топ көрші орналасқан ҚР Бас прокуратурасының Алматы қаласы бойынша Құқықтық статистика және арнайы есепке алу жөніндегі комитеті басқармасының ғимаратын басып алып, оны өртеп жіберген.
"Өрт сөндіру көліктері келгенге дейін шекарашылар өз күштерімен өрт сөндіруге кірісіп, прокуратураның 57 қызметкерін, Қорғаныс министрлігінің екі курсантын Шекара қызметі департаментінің аумағына эвакуациялады. Сонымен қатар, шекарашылар қылмыскерлердің 7 өрт сөндірушіні тұтқынға алу әрекетіне жол бермей, оларды ШҚ департаменті аумағына жасырған", - делінген хабарламада.
1026 рет оқылды
_140_110.webp)
