Алматы облысында жыл басынан бері 19 басшы қылмыстық жауапкершілікке тартылды, деп хабарлайды «Ұлт ақпарат» облыстық сыбайлас жемқорлық департаментіне сілтеме жасап.
Қазақстан Республикасы Сыбайлас жемқорлыққа қарсы іс-қимыл агенттігінің Алматы облысы бойынша департаменті басшысының бірінші орынбасары Жандос Жұмабаев 2021 жылдың 7 айында атқарылған жұмыстардың қорытындысы туралы баяндады.
Жандос Жұмабаевтың айтуынша, жыл басынан бері жедел-тергеу бағыты бойынша 84 қылмыстық іс қозғалды. Оның ішінде 66-ы жемқорлық фактісі бойынша орын алған. Ауыр құраммен 56 қылмыс, аса ауыр құрам бойынша 5 қылмыс тіркелген.
Жалпы осы уақыт ішінде тіркелген сыбайлас жемқорлық қылмыстар саны 78,3% көрсеткішті құрап отыр.
Есептік кезеңде барлығы 147 тұлға қылмыстық жауапкершілікке тартылған. Алматы облысында жыл басынан бері 19 басшы қылмыстық жауапкершілікке тартылған. Оның ішінде облыстық маңызы бар – 6 басшы, аудандық деңгейдегі – 7 басшы, қалалық деңгейдегі – 5 басшы және 1 ауылдық деңгейдегі басшы бар.
Сонымен қатар, есептік кезеңде «жүйелі» сыбайлас жемқорлықтың 8 фактісі анықталды. Кешенді іс-шараларды іске асыру нәтижесінде 22 адам әшкереленді. Жалпы саны 31 қылмыс тіркеліп, 4 қылмыстық іс сотқа жолдаумен аяқталды, 1 адам сотталды.
Сондай-ақ, жыл басынан бері барлық аяқталған қылмыстық істер бойынша келтірілген залалдың сомасы 812,5 миллион теңгені құрады. Бүгінгі күні 792,1 миллион теңге өтелді, яғни аяқталған қылмыстық істер бойынша келтірілген залалдың өтелуі 97,5% көрсеткішті құрайды.
Есепті кезеңде сыбайлас жемқорлық құқық бұзушылық фактісі туралы хабарлаған немесе сыбайлас жемқорлыққа қарсы іс-қимылда өзге де жолмен жәрдемдескен Алматы облысының 3 тұрғыны 612 570 теңгеге көтермеленді.
Айта кетсек, Алматы облысында 2020 жылдың 6 айында 128 қылмыстық құқық бұзушылық тіркеліп, оның 75%-дан астамы сыбайлас жемқорлық қылмысы (96) болған еді.
Аяқталған қылмыстық істер бойынша жалпы шығын 2,2 млрд. теңгені құрап, оның 1,6 млрд. теңгесі өтелген.
Ауыр және аса ауыр қылмыстар – 70%-ы, немесе 82 құқық бұзушылықты құрады.
Ең көп таралған сыбайлас жемқорлық қылмыстар – парақорлық – 58 факт немесе 60,4%, лауазымдық өкілеттікті теріс пайдалану – 17, немесе 17,7%, қызмет бабын пайдалана отырып алаяқтық жасау – 6 немесе 6,3%, сеніп тапсырылған бөтен мүлікті иемденіп алу немесе талан-таражға салу – 6 немесе 6,3%, билікті асыра пайдалану – 5 немесе 5,2%.
Сыбайлас жемқорлық қылмыстары үшін 75 адам қылмыстық жауапкершілікке тартылған, оның ішінде бірінші басшылар – 27 адам.
Тергеу тәжірибесіне сәйкес, жергілікті атқарушы органдар мен ведомстволық бағынысты мекемелердің қызметкерлері сыбайлас жемқорлық көріністеріне неғұрлым бейім екенін белгілі болып отыр.
725 рет оқылды
