Бүгін таңертең Алматы әкімі Бақытжан Сағынтаев ұшақ апаты болған жерге барды, деп хабарлайды "Ұлт ақпарат".
Бұл туралы әкімнің баспасөз хатшысы Әсет Мұқажанов Instagram парақшасында жазды.
«Бэк Эйр» әуе компаниясына тиесілі «Фоккер-100» ұшағының құлаған жеріне қала әкімі Бақытжан Сағынтаев барды. Қала басшысы іздестіру құтқару жұмыстарын бақылады. Одан шығып Алматы әуежайының терминалын аралап шықты. Содан кейін №4 аурухана мен Шұғыл медициналық көмек көрсету ауруханасына, Балаларға шұғыл медициналық көмек көрсету орталығына барып, зардап шеккен адамдардың халын білді. Қала басшысы қаза болғандардың отбасына қайғысына отақтасып көңіл айтты», - деді Әсет Мұқажанов.
Айта кету керек, бүгін Алматы — Нұр Сұлтан бағытындағы Бэк Эйр ұшағы Алматы облысы Әлмерек ауылында апатқа ұшырады.
Алдын ала ақпарат бойынша бортта 93 жолаушы, 5 экипаж мүшесі болған.
Қалалық әкімдік таратқан ақпарат бойынша, кезекші пультіне таңғы 7:43-те қоңырау түскен. Оқиға орнына Алматы облысының Іле және Талғар ауданынан 16 жедел жәрдем бригадасы шықты. Алматы қаласынан 35 жедел жәрдем бригадасы келді. 2 нейрохирургиялық бриагада жолға шықты.
Алматы облыстық көп профильді ауруханасына аса ауыр халдегі 5 пациент жеткізілді.
Балаларға шұғыл медициналық көмек көрсету орталығына 8 бала жеткізілді. Олардың барлығы түрлі жарақат алған. №4 қалалық клиникалық ауруханаға 17 аадам аса ауыр жарақатпен жеткізілді.
Қазір бұл жұмыстарға психологтар да жұмылдырылды.
1186 рет оқылды
_140_110.jpeg)
