Фото: nensuria/ru.freepik.com
Ақтөбеде 10 жасар қыз алаяқтардың құрбаны болды, – деп хабарлайды Polisia.kz.
Белгісіз әйел үй телефонына қоңырау шалып, 10 жасар қызға оның анасы жол-көлік оқиғасын жасап, жаяу жүргіншіні қағып кеткенін, жауапкершіліктен құтқару үшін көп ақша қажет екенін айтқан. Өзін тергеуші ретінде таныстырған әйел тіпті телефонды қыздың анасына бергендей кейіп танытқан. “Анасы” жылаған дауыспен баладан үйдегі бар ақшаны беріп жіберуді өтінген.
Бұдан әрі алаяқ 10 жасар қызға 700 мың теңге көлеміндегі ақша салынған пакетті өзінің сыбайласына қалай беру керектігін айтқан. Анасының қиындыққа тап болғанына сеніп, шошып қалған бала ақшаны олар айтқан нұсқау бойынша беріп жіберген. Анасы үйге келгеннен кейін ғана баланың алаяқтарға алданғаны белгілі болған.
"Полиция қызметкерлері жедел-іздестіру іс-шаралары барысында 23 жастағы күдіктіні ұстады. Ол өзінің кінәсін мойындап, әлеуметтік желі арқылы белгісіз адаммен кездескенін айтты. Ол оған жұмыс ұсынған. Міндет – жәбірленушіден ақша алу және барлық соманы көрсетілген “жұмыс берушінің” шотына аудару болған.
Осы факті бойынша ҚР ҚК-нің 190-бабы 1-бөлігі (Алаяқтық) бойынша сотқа дейінгі тергеу басталды" - делінген хабарламада.
Өңірде алаяқтықтың құрбаны болып, полицияға жүгінгендер саны артып барады. Алаяқтар жәбірленушілерге туыстары апатқа ұшырағанын айтып қоңырау шалып, зардап шегушілерді емдеу немесе қылмыстық істі тоқтату үшін қажет деген сылтаумен ақша талап етеді. Полиция қызметкерлері мұндай қоңырауларға сенбес бұрын, анық-қанығына көз жеткізу керек екенін еске салады.
342 рет оқылды
_140_110.webp)
