Танымал кино және театр актері Азамат Сатыбалды Темірбек Жүргенов атындағы Қазақ ұлттық өнер академиясының ректоры болып тағайындалды. Бұл туралы Қазақстан Ұлттық музейінің директоры Арыстанбек Мұхамедиұлы желідегі парақшасында хабарлады.
"Құрметті достар, танымал кино және театр актері, тележүргізуші, Қазақстанның еңбек сіңірген қайраткері Азамат Сатыбалдыны Т.Қ. Жүргенов атындағы Қазақ ұлттық өнер академиясының ректоры болып тағайындалуымен шын жүректен құттықтаймын!
Өнер адамының тағдыры ерекше! Қалың көрермен қауым Азаматты театр және кино өнерінің дамуына өлшеусіз үлес қосып жүрген дарыны ерекше өнер иесі ретінде таниды.
Стивен Кингтің «Табысты адам мен талантты адамның жалғыз айырмашылығы – ерінбей еңбек етуінде» деген керемет сөзі бар. Біліктілігі мен білімін, іскерлігі мен жігерін орайлы ұштастыра білген Азаматтың қазақ өнерінің болашақтағы бет-бейнесін қалыптастыратын нағыз кәсіби мамандар дайындау бағытында барлық қарым-қабілетін жұмсайтынына сенімім мол.
Азамат Сатыбалдыұлын жауапты қызметке тағайындалуымен құттықтай отырып, алдағы қызметіне сəттілік және табыс тілеймін!", - деп жазды Мұхамедиұлы.
Айта кетейік, ол бұған дейін Ғабит Мүсірепов атындағы Қазақ мемлекеттік академиялық балалар мен жасөспірімдер театрының директоры болды.
Азамат Сатыбалды 1977 жылы Жамбыл облысының Рысқұлов ауданында дүниеге келген. Көпбалалы отбасында туған. Үйдегі тоғыз баланың кенжесі. 1997 жылы Темірбек Жүргенов атындағы Өнер академиясына оқуға қабылданды. 2000 жылы дипломдық жұмысын қорғауға Қостанай облыстық драма театрына жіберілді.
2001 жылы дипломын алып, Мұхтар Әуезов атындағы мемлекеттік академиялық драма театрына жұмысқа орналасты.
"Ағайынды", "Жерұйық", "Ғашық жүрек-2", "Сыныптастар", Қара шаңырақ", "Рэкетир-2", "Үйге апарар жол", "Жұлдыздар тоғысқанда" және тағы басқа көптеген фильмге түсті.
1236 рет оқылды
