2021 жылғы 1 шілдеден бастап Қазақстанда Әкімшілік рәсімдік-процестік кодекс күшіне енеді. Осы заңнама аясында енгізіліп отырған жаңашылдықтарды ҚР Жоғарғы Сотының баспасөз хатшысы Айдос Садуақасов айтып берді, деп хабарлайды ҚазАқпарат.
«Еліміз нарықтық қатынастарға көшкеннен кейін, қоғамның түрлі салаларында туындаған даулардың кейбірінде азаматтар мемлекеттік органдармен, лауазым иелерінің шешімдерімен келіспей жатады. Өкінішке қарай, көп жағдайда жеке адамдардың мүддесі, құқығы сотта жоғары деңгейде қорғала бермейді. Оның себебіне тоқталсақ, құқықтық даулардың көбісі азаматтық-процестік кодекстің аясында қаралады. Яғни, азаматтық-процестік заңнамаға сәйкес, тараптар тең. Тараптар тең деген түсінік бойынша мемлекеттік орган, оның құқықтық аппараты заңгерлер корпусымен жеке адамдардың мүмкіндігін салыстыру қиын. Осы жерде теңсіздік туындайды, - деді А. Садуақасов Орталық коммуникациялар қызметінде.
Осы орайда ол аталған теңсіздікті жою үшін елімізде Әкімшілік әділет туралы заң қабылданғанын, бұл құжат 2021 жылғы 1 шілдеден бастап күшіне енетінін еске салды.
«Неліктен бір жыл уақыт берілді? Себебі соттарымыз осыған дайындалуы керек, сондай-ақ мемлекеттік органдар мен лауазымды тұлғалар осы заңның жаңа баптары мен жаңашылдықтарын меңгеруі тиіс», - деді баспасөз хатшысы.
«Осы заңға сәйкес, сіздің жер учаскеңізге, төлемақылар, берілуге тиіс лицензияларға қатысты мәселелер бойынша уәкілетті органмен немесе лауазымды тұлғамен арада даулар болған кезде, бұл істер азаматтық соттарда қаралады. Яғни, азаматтық соттарда азаматтық-процестік заң нормасы аясында қаралады. Бұл тұрғыда судьяның қолы байлаулы. Осы мәселеде судья жеке немесе заңды тұлғаға көмектесе алмайды. Оның берген талап-арызының қателігін көріп тұрса да, оған жақтасуға, көмектесуге құқығы жоқ. Енді қолданысқа енгізілетін заңға сәйкес, судьяның белсенді рөлі болады. Судья азаматтың талап-арызын дұрыстауға, оған құқықтық жағынан қолдау көрсетуге мүмкіндік береді. Атап айтқанда, бұл заң жеке адам мен заңды тұлғаның мемлекеттік органға немесе лауазымды тұлғаларға қарсы өзінің құқығын дұрыс қолдануына зор мүмкіндіктер жасайды», - деді Айдос Садуақасов.
1222 рет оқылды
