Vladimir Vinnichevskii - Keńes Odaǵy tarihyndaǵy eń jas ári qatygez seriialyq qylmyskerlerdiń biri. Ol 1923 jyly Sverdlovsk qalasynda dúniege kelgen. 1940 jyly sot sheshimimen atý jazasyna kesilip, 17 jas 5 aiynda atylǵan,, dep habarlaidy ult.kz.
Vinnichevskii 1938–1939 jyldary Sverdlovsk, Nijnii Tagil jáne Kýshva qalalarynda eki men tórt jas aralyǵyndaǵy balalarǵa keminde 18 ret shabýyl jasaǵan. Onyń segizi ólimmen aiaqtalǵan.
Balalyq shaǵy
Vinnichevskii aýqatty otbasynda ósken. Ákesi qalalyq kommýnaldyq sharýashylyqta sheber bolyp jumys istegen. Al anasy esepshi bolǵan. Otbasy Sverdlovsk ortalyǵyndaǵy jeke úide turǵan.
Sol ýaqyttyń ólshemimen qaraǵanda, olardyń jaǵdaiy jaqsy bolǵan. Vladimirdiń óz kostiými, tank shlemi, shveitsar pyshaǵy jáne bylǵary aiaq kiimi bolǵan. Ol Sverdlovskidegi №16 mekteptiń 7-synybynda oqyǵan. Sabaq úlgerimi nashar bolyp, bir jylǵa synypta qalyp qoiǵan. Biraq án aitýǵa qatty qyzyqqan.
Alǵashqy qylmysy
Alǵashqy belgili qylmysyn ol 1938 jyldyń jazynda nemese kúz basynda jasaǵan.
Tórt jasar Gerta Gribanovany jeke úidiń aýlasynan aldap alyp shyǵyp, baqshaǵa aparǵan. Sol jerde qyzdy tunshyqtyryp, keiin basynan as úi pyshaǵymen keminde segiz ret soqqy jasaǵan. Soqqynyń qatty bolǵany sonsha, pyshaq synyp ketip, onyń bir bóligi balanyń bas súieginde qalyp qoiǵan.
Osy oqiǵadan keiin Vinnichevskii synǵan pyshaqty laqtyryp tastap, keiingi qylmystarynda buraýysh pen jinalmaly pyshaq qoldanǵan.
Qylmystary
Vinnichevskii qylmysty kóbine Sverdlovskide jasaǵan. Biraq basqa qalalarǵa da baryp turǵan. Bir shabýyldy Nijnii Tagilde, taǵy birin Kýshvada jasaǵan.
Ol ul balalarǵa da, qyz balalarǵa da shabýyl jasaǵan. Tergeý málimetinshe, onyń maqsaty balalarǵa seksýaldyq zorlyq jasaý bolǵan. Keiin qurbandaryn tunshyqtyryp óltirgen, kei jaǵdaida sýyq qarýmen soqqy jasaǵan.
Besinshi qurbany tórt jasar Boria Titov bolǵan. Qylmysker balany shanamen syrǵanaýǵa shaqyryp, ien jerge aparǵan. Shabýyldan keiin qardyń arasyna tastap ketken. Biraq Boria aman qalyp, tergeýshilerge qylmysker týraly alǵashqy málimetti bergen. Jetinshi shabýylyn ol Kýshvada úsh jasar Katia Lobanovaǵa jasaǵan. Qyzdy óltirip, máiitin iis shyqpaý úshin shuńqyrǵa tastaǵan.
Keiin úsh jasar Alia Gýbinany urlap, oǵan birneshe ret pyshaq suqqan. Biraq qyzdy tez izdep tapqandyqtan, ol tiri qalǵan.
Vinnichevskii jyl mezgiline qarai máiitterdi jasyrý tásilin ózgertip otyrǵan. Qysta qar astyna kómse, jaz ben kúzde shóppen, butaqpen jáne japyraqpen jaýyp ketken.
Ustalý sáti
Bastapqyda politsiia bul qylmystardyń bárin bir adam jasaǵanyn birden túsinbegen. Sebebi shabýyldar ártúrli qalalarda bolǵan. Onyń ústine ata-analar keide politsiiaǵa birden júginbegen.
Tergeýshiler qylmysker buryn sottalǵan eresek adam dep oilaǵan. Tipti ony 20–25 jastaǵy, syrt kelbeti jas kórinetin adam bolýy múmkin dep boljaǵan.
Tek 1939 jyldyń kókteminiń sońynda ǵana balalarǵa jasalǵan shabýyldardyń bári bir qylmyskerdiń qolynan shyqqany anyqtalǵan. Sol jyly Sverdlovskide politsiia patrýlderi kúsheitilip, 300-den astam adam ustalǵan. 1939 jyldyń 24 qazanynda Vinnichevskii qylmys ústinde qolǵa tústi.
Ol úsh jasar Slava Volkovty úiiniń mańynan alyp shyǵya, tramvaimen qala syrtyna aparǵan. Keiin uiqyda jatqan balany orman jaqqa kóterip aparǵan.Al politsiia qyzmetkerleri onyń sońynan únsiz erip otyrǵan. Vinnichevskii balany tunshyqtyra bastaǵan sátte ustalǵan. Osylaisha Slava Volkov aman qalǵan.
Tergeý men sot úkimi
Tergeý kezinde Vinnichevskii qylmystaryn moiyndaǵan. Belgili bolǵandai, ol jasaǵan shabýyldarynyń bárin qaǵazǵa jazyp, mátindi shifrlap saqtap otyrǵan.
Onyń ata-anasy oblystyq gazetke mynadai málimdeme bergen:
«Biz mundai uldan bas tartamyz jáne oǵan eń aýyr jaza atý jazasyn qoldanýdy talap etemiz. Mundai azǵynǵa keńestik otbasynda oryn joq».
1940 jyldyń 16 qańtarynda sot Vinnichevskiidi atý jazasyna kesken. Advokattyń talabymen oǵan psihiatriialyq saraptama taǵaiyndalǵan. Sarapshylar ony aqyl-esi durys dep tanyǵan.
1940 jyldyń tamyzynda is qaita qaralǵanymen, sot burynǵy úkimdi ózgerissiz qaldyrǵan. Vinnichevskii keiin Joǵarǵy sotqa keshirim surap hat jazǵan. Ol qylmystaryn moiyndaǵanymen, ómirin saqtap qalýdy ótingen. Alaida keshirim berilmedi.
1940 jyldyń 11 qarashasynda Vladimir Vinnichevskii 17 jasynda atý jazasyna kesildi.
