Qurban ait jaqyndaǵan saiyn Qazaqstanda qurbandyqqa shalynatyn mal baǵasy kúrt qymbattady. Biyl ásirese iri qara men qoi quny aitarlyqtai ósip, kei óńirlerde baǵa bir jylda 40 paiyzdan asyp ketken, dep habarlaidy ult.kz.
Energyprom.kz saitynyń jazýynshaǵ 2026 jyldyń naýryz aiynyń qorytyndysy boiynsha eldegi mal basy barlyq negizgi sanattarda kóbeigen. Iri qara sany 9,2 millionǵa jetip, ótken jylmen salystyrǵanda 2,9 paiyzǵa artty. Qoi sany 21,1 millionǵa, eshki 2 million basqa jetse, eń joǵary ósim jylqy sharýashylyǵynda tirkelip, kórsetkish 7,1 paiyzǵa ósken.
Maldyń basym bóligi áli de jeke sharýashylyqtar men sharýa qojalyqtarynda ustalady. Iri qaranyń jartysyna jýyǵy aýyl turǵyndarynyń aýlasynda bolsa, qoi men eshki sharýashylyǵynda da jeke sektor negizgi úlesti ielenip otyr.
Mal sany boiynsha kósh basynda Túrkistan oblysy tur. Óńirde 1,2 million iri qara, 4,7 million qoi jáne jarty millionnan astam jylqy bar. Al túie sharýashylyǵy boiynsha Mańǵystaý oblysy alda keledi — eldegi túieniń úshten birinen astamy osy aimaqta ósiriledi.
Qurban ait aldyndaǵy suranys mal baǵasyna tikelei áser etti. Naýryz aiynda bir siyrdyń ortasha baǵasy 489 myń teńgeden assa, buqa 526 myń teńgege, jylqy 581 myń teńgege deiin jetken. Eń qymbat mal — túie. Erkek túieniń ortasha baǵasy 804 myń teńgeden asqan.
Qoidyń ortasha baǵasy 77 myń teńge bolsa, qoshqarlar 86 myń teńgeden satylǵan. Al qurbandyq shalýǵa arnalǵan resmi qyzmet baǵasy budan da joǵary. Máselen, iri qarany qurbandyqqa shalý quny 630 myńnan 945 myń teńgege deiin barady. Qoi baǵasy 100–150 myń teńge aralyǵynda, eshki 55–100 myń teńge shamasynda. Túie baǵasy barlyq óńirde birdei — 1,1 million teńge.
Biyl Qazaqstanda onlain qurbandyq shalý qyzmeti de iske qosyldy. Qazaqstan musylmandary dini basqarmasy usynǵan arnaiy platforma arqyly turǵyndar mal satyp alyp, qurbandyq shalýdy qashyqtan rásimdei alady. Bul dástúrli mal bazarlaryndaǵy saýdaǵa da áser etýi múmkin.
Sarapshylardyń aitýynsha, sońǵy jyldary mal baǵasy birqalypty ósip kelgenimen, biylǵy qymbatshylyq erekshe baiqalady. Máselen, iri qara quny buryn jylyna 4–6 paiyz aralyǵynda ósse, qazir ósim 15,6 paiyzǵa jetken.
Eń joǵary baǵa ósimi Abai oblysynda tirkeldi. Bul óńirde iri qara bir jylda 42,1 paiyzǵa qymbattaǵan. Qaraǵandy, Túrkistan jáne Qostanai oblystarynda da baǵa aitarlyqtai kóterilgen. Qoi men jylqy baǵasy boiynsha da Abai oblysy kósh bastap tur.
