23 mamyrdan bastap Almaty qalasynyń birqatar kóshesinde kólik qozǵalysynyń jańa tártibi engiziledi, dep habarlaidy ult.kz.
Qalalyq Jol qozǵalysy jáne jolaýshylar kóligin uiymdastyrý basqarmasynyń málimetinshe, Ýálihanov kóshesiniń Qabanbai batyr kóshesinen Qazybek bi kóshesine deiingi bóliginde soltústik baǵytta birjaqty qozǵalys uiymdastyrylady.
Sonymen qatar Jýkov kóshesinde ońtústik baǵytta jáne Manaev kóshesinde soltústik baǵytta Zataevich kóshesinen Ahmediarov kóshesine deiingi aralyqta da birjaqty qozǵalys engiziledi.
Mamandardyń aitýynsha, bul sheshim Almaty qalasy Politsiia departamentiniń ákimshilik politsiia basqarmasymen birlesip qabyldanǵan. Negizgi maqsat – kólik júktemesin azaitý, kóshe-jol jelisiniń ótkizý qabiletin arttyrý jáne joldaǵy keptelis pen qaýipti jaǵdailardyń sanyn tómendetý.
Basqarma ókilderi ózgerister qazirgi kólik jaǵdaiyna júrgizilgen taldaý men aýdan turǵyndarynyń ótinishteri negizinde qabyldanǵanyn atap ótti.
Sondai-aq jańa qozǵalys tártibi ázirge pilottyq rejimde iske qosylady. Monitoring nátijesine qarai aldaǵy ýaqytta qosymsha sheshimder qabyldanbaq.
