Qazaqstanda halyq sanynyń ósýi men meditsinalyq mekemelerge túsetin júktemeniń artýy dáriger tapshylyǵy máselesin kúsheitip otyr, dep habarlaidy Ult.kz ranking.kz deregine silteme jasap.
2026 jyldyń birinshi toqsanynyń qorytyndysy boiynsha elde 57 myńnan astam dáriger tirkelgen. Bul kórsetkish ótken jylmen salystyrǵanda aitarlyqtai ózgermegenimen, jan basyna shaqqandaǵy qamtamasyz etý deńgeii tómendep keledi.
Máselen, 2025 jyldyń birinshi toqsanynda 10 myń turǵynǵa 28,2 dárigerden kelse, biyl bul kórsetkish 27,9-ǵa deiin azaiǵan. Sarapshylar muny alańdatarlyq úrdis dep baǵalaidy.
Óńirler arasyndaǵy aiyrmashylyq ta aiqyn baiqalady. 20 óńirdiń tek altaýynda ǵana dárigermen qamtý deńgeii respýblikalyq ortasha kórsetkishten joǵary. Eń joǵary kórsetkish Astanada tirkelgen — 10 myń turǵynǵa 41,8 dárigerden keledi. Almatyda bul kórsetkish 36,7 bolsa, Qaraǵandy oblysynda 34,7 dárigerdi quraidy.
Al eń tómen kórsetkish Almaty jáne Mańǵystaý oblystarynda baiqalady — ár 10 myń turǵynǵa nebári 20,2 dárigerden keledi. Jambyl oblysynda — 21,5, Qostanai oblysynda — 21,8, Aqmola oblysynda 22 dárigerden tirkelgen.
Orta meditsinalyq personalmen qamtamasyz etý deńgeii de tómendegen. 2026 jyldyń birinshi toqsanynda 10 myń turǵynǵa shaqqanda 76 orta meditsina qyzmetkerinen kelgen. Bir jyl buryn bul kórsetkish 77,9 bolǵan.
Sarapshylardyń aitýynsha, meditsina mamandarynyń iri qalalarda shoǵyrlanýy men óńirlerdegi kadr tapshylyǵy uzaq merzimde sapaly meditsinalyq kómekke qoljetimdilik teńsizdigin kúsheitýi múmkin. Sondyqtan jańa mamandar daiarlaý, meditsinalyq bilim sapasyn arttyrý jáne dárigerlerdi aimaqtarǵa tartý máselesi ózekti bolyp otyr.
