Ekibastuzda jeti jasar bala ashyq jatqan káriz qudyǵyna qulap, aýrýhanaǵa tústi. Oqiǵa sáti videoǵa túsip, áleýmettik jelide tarady, dep habarlaidy ult.kz.
Avtordyń aitýynsha, jazataiym jaǵdai 20 mamyr kúni qalanyń ortalyq alańyndaǵy eki sýburqaqtyń arasynda bolǵan. 2019 jyly týǵan bala tereńdigi eki metrden asatyn, qorshalmaǵan qudyqqa qulap ketken.
Saldarynan jetkinshek dene jaraqatyn alyp, qazir meditsinalyq mekemede em qabyldap jatyr.
Video avtory qaýipti nysannyń adam kóp jinalatyn qoǵamdyq orynda ornalasqanyna nazar aýdaryp, aýmaqta eshqandai qorshaý men eskertý belgisi bolmaǵanyn aitqan.
«Bul jaǵdai qalalyq infraqurylymǵa jaýapty mekemelerdiń óz mindetine salǵyrt qaraǵanyn kórsetedi», — dep jazdy ol Instagram paraqshasynda.
Sondai-aq avtor kinálilerdi jaýapqa tartýdy jáne oqiǵaǵa quqyqtyq baǵa berýdi talap etti.
Pavlodar oblystyq politsiia departamentiniń málimetinshe, atalǵan derek boiynsha qaýipsizdik erejelerin buzý babymen qylmystyq is qozǵalǵan.
«Qazir qajetti tergeý amaldary júrgizilip jatyr. Oqiǵanyń sebepteri men barlyq mán-jaiy anyqtalady», — dep habarlady vedomstvodan.
