Qaraǵandyda politseiler egde jastaǵy turǵyndardy aldap, milliondaǵan teńgeni iemdengen 31 jastaǵy kúdiktini ustady, dep habarlaidy ult.kz.
Oblystyq politsiia departamentiniń aldyn ala málimeti boiynsha, er adam qariialardyń senimine kirip, jalpy somasy 2,8 million teńgeden astam qarajatty iemdengen.
Tergeý barysynda kúdiktiniń qylmysty túski ýaqytta jasap otyrǵany anyqtalǵan. Ol aldyn ala oilastyrylǵan shema boiynsha áreket etip, zeinetkerlerdiń ańǵaldyǵyn paidalanǵan.
Politsiia málimetinshe, alǵashqy jaǵdaida kúdikti ózin ýchaskelik inspektor retinde tanystyryp, 77 jastaǵy qariianyń úiine kirgen.
«Telefon nómirlerin «jańartý» syltaýymen ol zeinetkerdiń depozittik shotynan óz esepshotyna 1 million 350 myń teńge aýdaryp alǵan», — delingen habarlamada.
Qariia aqshasynyń joǵalǵanyn tek keshke qarai baiqaǵan.
Kelesi kúni dál osy kúdikti 74 jastaǵy taǵy bir turǵyndy aldaǵan. Bul joly ol ózin áleýmettik qyzmetker retinde tanystyryp, meditsinalyq taksi rásimdeýge kómektesetinin aitqan.
Senimge kirý úshin áielge 20 myń teńge bergen. Keiin «taksi kartasyn rásimdeý» barysynda zeinetkerdiń biometriialyq beinejazbasyn túsirip alǵan.
Arada kóp ýaqyt ótpei bank qyzmetkerleri habarlasyp, áieldiń atyna nesie rásimdelgenin jetkizgen. Keltirilgen shyǵyn kólemi 1,5 million teńgeni quraǵan.
Jedel izdestirý sharalary kezinde kúdiktiniń buryn alaiaqtyq úshin sottalǵan Qaraǵandy qalasynyń 31 jastaǵy turǵyny ekeni anyqtaldy.
Qazir ol qamaýǵa alynyp, sotqa deiingi tergeý amaldary júrgizilip jatyr. Politseiler onyń osyǵan uqsas basqa da qylmystarǵa qatysy bar-joǵyn tekserýde.
