Jasandy intellekt búginde iri biznestiń kúndelikti jumysynyń bir bóligine ainalyp keledi. Kompaniialar II-di endi tek tájiribelik tehnologiia retinde emes, analitikany jedeldetý, protsesterdi avtomattandyrý jáne klienttermen bailanystyń tiimdiligin arttyrý quraly retinde qoldana bastady, dep habarlaidy ult.kz.
Qazaqstan úshin tsifrlandyrý taqyryby qazir strategiialyq mańyzǵa ie. Prezident Qasym-Jomart Toqaev 2026 jyldy Tsifrlandyrý jáne jasandy intellekt jyly dep jariialaý arqyly jekelegen bastamalardan ekonomikany jáne biznes-protsesterdi júieli transformatsiialaýǵa kóshýge jol ashty.
Qazirgi tańda jasandy intellekt túrli salalarǵa, sonyń ishinde telekom sektoryna da engizilip jatyr. Munda tehnologiialar úlken kólemdegi derekterdi óńdeý, protsesterdi ońtailandyrý jáne klienttik servisterdi damytý úshin paidalanylady. Máselen, Kcell kompaniiasynda jasandy intellekt klienttermen kommýnikatsiiada, derektermen jumys isteýde jáne operatsiialyq mindetterdiń bir bóliginde qoldanylady. Kompaniia ishinde II qyzmetkerlerge aqparatty jyldam óńdeýge jáne sheshim qabyldaý protsesin jedeldetýge kómektesetin qural retinde qarastyrylady.
Kcell kompaniiasynyń Big Data jáne klienttik qundylyqtardy basqarý departamentiniń direktory Askar Dúishenálievtiń aitýynsha, búginde II kodpen jumys isteýde, qujat daiyndaýda jáne derekterdi taldaýda belsendi qoldanylady.
— Jasandy intellekt komandadaǵy ekinshi analitikke ainaldy. Ol gipotezalardy jyldam tekserýge jáne biznes úshin sheshimderdi tezirek tabýǵa kómektesedi, — deidi maman.
Jasandy intellektiń eń aiqyn tiimdiligi kúndelikti qaitalanatyn protsesterdi avtomattandyrýdan baiqalady. Buryn shablondyq kodtardy, prezentatsiialar men turaqty esepterdi daiyndaýǵa birneshe saǵat ketse, qazir mundai mindetterdiń basym bóligi áldeqaida jyldam oryndalyp, tek mamannyń sońǵy tekserýin qajet etedi. Sonyń arqasynda sarapshylar derekterdi túsindirýge jáne bizneske mańyzdy insaittardy izdeýge kóbirek ýaqyt bóle bastady.
Kompaniiadaǵy negizgi baǵyttardyń biri — prediktivti analitika. Munda abonentterdiń ketý yqtimaldyǵyn boljaityn model engizilgen. Ol klientterdiń minez-qulqyn taldap, kompaniiadan ketýi múmkin paidalanýshylardy aldyn ala anyqtaýǵa múmkindik beredi. Nátijesinde marketingtik shyǵyndardy arttyrmai-aq retention-kampaniialardyń tiimdiligi ósken.
Sonymen qatar kompaniia klienttik bazany avtomatty túrde segmentteý júiesin qoldanady. Buryn aýditoriia qolmen bólinse, qazir modelder paidalanýshylardyń áreketterin taldap, kommýnikatsiia logikasy ártúrli turaqty segmentterdi qalyptastyrady. Bul klientterge usynystardy anaǵurlym dál ári tiimdi etýge kómektesedi.
Taǵy bir baǵyt — abonenttermen bailanys ýaqytyn ońtailandyrý. Buryn habarlamalar bárine bir ýaqytta jiberilse, endi arnaiy modelder ár klientke habarlasýdyń eń qolaily ýaqytyn anyqtaidy. Sonyń nátijesinde open rate pen CTR kórsetkishteri kontentti ózgertpei-aq jáne qosymsha jarnama shyǵyndarynsyz artqan.
Jasandy intellekt kompaniia ishindegi jumys protsesterin de ózgertip keledi. Sarapshylar mehanikalyq jumystarǵa az ýaqyt jumsap, derekterdi taldaý, zańdylyqtardy anyqtaý jáne sheshim qabyldaýǵa kóbirek nazar aýdara bastady. Bólimder arasyndaǵy bailanys ta naqtyraq sipat alyp, endi talqylaýlar derekter massiviniń ainalasynda emes, daiyn insaittar men bizneske arnalǵan usynystar negizinde júrgiziledi.
Degenmen mamandar II tiimdiligi derekterdiń sapasy men mindetterdiń durys qoiylýyna tikelei bailanysty ekenin aitady. Aqparat jetkiliksiz nemese sapasy tómen bolǵan jaǵdaida modelder qate nátije kórsetýi múmkin. Sondai-aq jeke derekter men basqarýshylyq sheshimderge qatysty algoritmderdiń túsindirmeliligi de mańyzdy máselelerdiń biri bolyp qala beredi.
Sarapshylardyń pikirinshe, aldaǵy jyldary kúndelikti analitikanyń edáýir bóligi avtomattandyrylady. Al derektermen jumys istei alatyn, II júielerine durys suranys qurastyryp, analitika nátijesin biznes mindetterimen bailanystyra biletin mamandardyń mańyzy arta túsedi.
