Qarmet kompaniiasyna qarasty T. Kúzembaev atyndaǵy shahtada kómir óndirýdi qaýipsiz ári tiimdi etýge septesetin jańa zamanaýi jabdyqty iske qosýǵa daiyndyq júrip jatyr. Bul – nemistiń Hauhinco kompaniiasynyń joǵary ónimdi sorǵy stantsiiasy, dep habarlaidy ult.kz.
Atalǵan stantsiia shahterlerdiń basyndaǵy taý jynystaryn ustap turatyn arnaiy shahta qurylymynyń jumysyn qamtamasyz etedi. Onyń turaqty jumysyna adamdardyń qaýipsizdigi men kómir óndirisiniń úzdiksizdigi tikelei bailanysty.
Bul ýchaskedegi burynǵy jabdyq 20 jyldan astam jumys istep, qazirgi senimdilik pen tiimdilik talaptaryna sai kelmeitin edi. Jańa sorǵy stantsiiasy shahtany tehnikalyq qaita jaraqtandyrý baǵdarlamasy aiasynda sonyń ornyna ornatyldy.
Jabdyqtyń qýaty joǵary: stantsiia minýtyna 320 bar qysymmen 600 litrge deiin arnaiy suiyqtyq beredi. Sonyń arqasynda júie eleýli júktemeler kezinde de turaqty jumys istei alady. Sonymen qatar, jabdyq tolyqtai derlik avtomattandyrylǵan: stantsiia júktemeni ózi baqylap, qajet bolǵan jaǵdaida qosymsha sorǵylardy iske qosady.
«Júkteme artqanda júie turaqty qysymdy ustap turý úshin ekinshi, sodan keiin úshinshi sorǵyny ózi iske qosady. Mundai avtomattandyrý jumysymyzdy edáýir jeńildetip, elektr energiiasyn únemdeýge múmkindik beredi», – dedi kómir óndirý ýchaskesiniń mehanigi Aleksandr Vorotyntsev.
Taǵy bir mańyzdy artyqshylyǵy – jańa jabdyq jer astynda statsionarlyq túrde ornatylady. Buryn aýyr sorǵy stantsiiasyn óndirý jumystarynyń ilgerileýine qarai únemi jyljytyp otyrýǵa týra keletin. Endi mundai qajettilik bolmaidy, bul jumysty yńǵaily ári qaýipsiz etedi.
«Bul sorǵylar óte qýatty. Bir lavanyń jumysyna ekeýi jetkilikti, al buryn dál osyndai mindetti oryndaý úshin eki ese kóp jabdyq qajet bolatyn. Stantsiialar uzaq merzimge qyzmet etýge eseptelgen», – dedi Hauhinco kompaniiasynyń ókilderi.
Jańa jabdyq Qarmet-tiń Ónerkásipti damytý qorymen yntymaqtastyǵy aiasynda satyp alynǵan. Aldaǵy ýaqytta osyndai sorǵy stantsiialaryn kompaniianyń basqa shahtalaryna da ornatý josparlanyp otyr. Jańa sorǵy stantsiiasyn engizý jabdyqtyń senimdiligin arttyrýǵa, bos turyp qalýlardy azaitýǵa jáne shahterlerdiń eńbek jaǵdaiyn jaqsartýǵa múmkindik beredi.
T. Kúzembaev atyndaǵy shahtadaǵy tehnikany jańartý – kompaniianyń kómir kásiporyndaryn aýqymdy jańǵyrtý baǵdarlamasynyń bir bóligi. Qarmet shahtalarynda óndiris tiimdiligin arttyrýǵa jáne jumysshylardy qorǵaýǵa baǵyttalǵan zamanaýi jabdyqtar, avtomattandyrý júieleri men ónerkásiptik qaýipsizdik tehnologiialary engizilýin jalǵastyryp keledi.
