Atyraýda sheteldik nómirli kólik ieleri jappai tekserýler men aiyppuldarǵa qarsylyq bildirip, qaladaǵy avtoturaqtardyń birine júzdegen kólikpen jinaldy, dep habarlaidy ult.kz.
«Aqjaiyq» basylymynyń jazýynsha, «Saltanat saraiy» mańyna toptasqan júrgizýshiler politsiia reidteriniń kúsheiýine alańdaýly ekenin aitty.
Olardyń basym bóligi Armeniia, Grýziia jáne Resei tirkeýindegi avtokólikterdi tizgindep júrgender.
Júrgizýshilerdiń aitýynsha, sońǵy kúnderi qalada ózge óńirlerden kelgen politsiia ekipajdarynyń sany kóbeiip, tekserýler jiilegen. Quqyq qorǵaý organdary kólik qujattaryn, saqtandyrý polisterin, órt sóndirgish pen alǵashqy kómek qobdishasyn muqiiat tekserip jatqan kórinedi. Bul jaǵdai sheteldik nómirli kólik ieleri arasynda úlken alańdaýshylyq týǵyzǵan.
Grýziialyq nómirli kólik iesi Ádilbek Tabyldiev birneshe jyldan beri esh qiyndyqsyz kólik júrgizip kelgenin aitady. Endi saqtandyrý rásimdeý talaptary men yqtimal aiyppuldar júrgizýshilerdi tyǵyryqqa tirep otyrǵanyn jetkizdi.
Narazylyqqa shyqqandar Atyraýda mundai aýqymdy kúsheitilgen baqylaýdyń qajettiligine kúmán keltiredi. Olardyń pikirinshe, qalada quqyq buzýshylyq deńgeii sonshalyqty kúrdeli emes.
Beiresmi derekterge sáikes, Atyraýda bes myńnan astam sheteldik nómirli kólik bar. Onyń kóbi Grýziia men Armeniiada tirkelgen.
Oqiǵa ornyna politsiia, ákimdik, prokýratýra jáne UQK ókilderi barǵanymen, júrgizýshiler naqty túsindirý jumystary júrgizilmegenin aitady. Áleýmettik jeliler men ortaq chattarda kólik ieleri aldaǵy reidter men áreket josparyn qyzý talqylap jatyr.
Al Atyraý oblystyq politsiia departamenti óńirde keshendi profilaktikalyq sharalar júrgizilip jatqanyn málimdedi. Resmi aqparatqa sáikes, kúsheitilgen baqylaý qoǵamdyq tártipti saqtaý, quqyq buzýshylyqtyń aldyn alý jáne jol qaýipsizdigin qamtamasyz etý maqsatynda qolǵa alynǵan.
Politsiia ókilderi reidterdiń kriminogendik ahýaldy turaqtandyrýǵa baǵyttalǵanyn aityp, qoǵamdyq tártipti buzýǵa jol berilmeitinin eskertti.
