Aqtóbede bes qabatty turǵyn úidiń shatyry órtenip, ondaǵan adam qaýipsiz jerge kóshirildi. Oqiǵa Sátbaev kóshesindegi kópqabatty úilerdiń birinde bolǵan, dep habarlaidy ult.kz.
Tótenshe jaǵdai ornyna órttiń joǵary shaqyrtý deńgeii boiynsha qutqarýshylar men arnaiy tehnika jedel jiberilgen. Órt sóndirýshiler jetken kezde turǵyn úi shatyry ashyq jalynǵa oranǵany anyqtaldy.
TJM málimetinshe, tilsiz jaý 290 sharshy metr aýmaqty sharpyǵan. Qaýipsizdik maqsatynda 50 turǵyn, onyń ishinde 12 bala evakýatsiialandy. Turǵyndarǵa arnaiy avtokólik bazasynda jylytý pýnkti uiymdastyrylǵan.
Órtti aýyzdyqtaýǵa 70-ten astam maman men 30-ǵa jýyq tehnika jumyldyryldy. Qutqarýshylardyń jedel áreketiniń arqasynda órt tolyq sóndirildi.
Aldyn ala málimet boiynsha, zardap shekkender joq. Órttiń shyǵý sebebi anyqtalyp jatyr.
