Almatydaǵy Ál-Farabi dańǵylynda úsh adamnyń ómirin qiǵan rezonansty jol apatyna qatysty qylmystyq is sotqa tústi. Aldyn ala sot otyrysy 28 mamyr kúni Almaty qalasynyń Qylmystyq ister jónindegi mamandandyrylǵan aýdanaralyq sotynda ótedi, dep habarlaidy ult.kz.
Bul týraly jábirlenýshi taraptyń advokaty Oleg Chernov málimdedi. Onyń aitýynsha, sotqa deiingi tergeý qysqa merzimde aiaqtalǵan. Qalalyq sot ta istiń óndiriske qabyldanǵanyn rastady. Alaida sot otyrysynyń ashyq nemese jabyq formatta ótetini ázirge belgisiz.
Eske salsaq, qaiǵyly oqiǵa 21 naýryzǵa qaraǵan túni Ál-Farabi dańǵyly men Meńdiqulov kóshesiniń qiylysynda bolǵan. Mercedes pen Zeekr kólikteri soqtyǵysyp, saldarynan Mercedes júrgizýshisi men eki jolaýshy qyz oqiǵa ornynda qaza tapty. Al Zeekr júrgizýshisi túrli jaraqatpen aýrýhanaǵa jetkizilgen. Tergeý málimetinshe, ol kólikti mas kúide basqarǵan.
Kúdiktige Qylmystyq kodekstiń 345-baby 4-bóligi boiynsha aiyp taǵylǵan. Bul bap 10 jylǵa deiin bas bostandyǵynan aiyrý jazasyn qarastyrady. Qazir oǵan qatysty “kúzetpen ustaý” bultartpaý sharasy qoldanylǵan.
Atalǵan is qoǵamda úlken rezonans týǵyzdy. Áleýmettik jelilerde jol apatyna kóshe jarysy sebep bolýy múmkin degen nusqalar tarady. Kei jazbalarda jarysqa politsiia departamentiniń joǵary laýazymdy qyzmetkeri qatysy bolýy yqtimal ekeni aitylǵan.
Osydan keiin Ishki ister ministrligi birqatar qyzmettik tekserý júrgizip, Almaty politsiia departamentiniń birneshe basshysyn qyzmetinen bosatty. Sonymen qatar departament basshylarynyń biriniń júrgizýshisine qatysty áreketsizdik faktisi boiynsha bólek qylmystyq is qozǵaldy.
IIM málimetinshe, memlekettik nómirlik belgilerdiń zańsyz berilýi múmkin degen kúdik boiynsha da qosymsha tergeý bastalǵan. Qazir bul baǵyttaǵy materialdardy Ózindik qaýipsizdik departamenti qarap jatyr.
Qoǵam nazaryn aýdarǵan is endi sotta qaralady. Marqumdardyń týystary ádil sheshim shyǵarylady dep úmittenedi.
