21 ақп, 2022 сағат 18:10

Жүргенов атындағы Қазақ ұлттық өнер академиясына жаңа ректор келді


Белгілі актер Азамат Сатыбалды Темірбек Жүргенов атындағы қазақ ұлттық өнер академиясының ректоры болып тағайындалды. Бұл туралы Мәдениет және спорт министрі Дәурен Абаев Facebook парақшасында хабарлады.

"Ресми түрде келісу рәсімдерінің барлығы тәмамдалған соң Азамат Сатыбалдының Т.Жүргенов атындағы қазақ ұлттық өнер академиясының ректоры болып тағайындалғанын хабарлаймын. Отандық мәдениеттегі орны бөлек оқу ордасын басқаруда абырой мен сәттілік тілеймін!", - деп жазды министр.

Былтыр маусым айынан бастап академия ректоры міндетін Ғалым Шәріпбек атқарды.

44 жастағы Азамат Сатыбалды - Қазақстанның еңбек сіңірген қайраткері, драма театр, кино актері, продюсер.

2001 жылы Т. Жүргенов атындағы өнер академиясын тәмамдаған. Сол жылдан бастап М. Әуезов атындағы Қазақ мемлекеттік академиялық драма театрында жұмыс істеді.

2018 жылдың 27 желтоқсанынан 2022 жылдың 12 ақпанына дейін Ғ.Мүсірепов атындағы Қазақ мемлекеттік академиялық балалар мен жасөспірімдер театрының директоры болды.

2017 жылы "Cinema 28" киностудиясын және "28 Theatre" атты жеке театрын ашты.

Азамат Сатыбалды теледидарда да жұмыс істеп, концерттер мен шоу-бағдарламаларды жүргізген.