Фото: adyrna.kz
Ұлттық құрылтай – еліміздегі үлкен диалог тетігіне айналған өзекті басқосу алаңы екеніне бұған дейінгі өткен отырыстарда көз жеткіздік. Бұл туралы Ұлттық құрылтай мүшесі, Мәжіліс депутаты Жұлдыз Сүлейменова Ult.kz хабарлайды."Біз ұзақ жылдан бері қордаланып, түйіні тарқамаған түйткілді мәселелерді осы диалог алаңында талқыға салып, заңнамалық тәртіппен реттеп, тиісті шешімдерін қабылдадық" деп отыр Жұлдыз Сүлейменова.
"Әрине, мұның бәрі оңайлықпен келе қоймады. Уақыт өте келе Мемлекет басшысы бастаған құрылтай мүшелерінің барлық бастамасы дұрыс екені дәлелдене бастады. Осы ретте лудоманияға қарсы күрестегі заңнамалық жетістікті айрықша атауға болады. Статистика көрсеткендей, бұл дерт мемлекеттік қызметшілер мен әскерилердің де арасында кең тарап кеткен. Ендігәрі мұндай зиянды кеселдің таралуына тосқауыл қойылып, жалпы осы ойын бизнесіне мүлдем тыйым салынды.
Сонымен қатар, әйелдер мен балалардың құқықтарын қорғап, қауіпсіздігін қамтамасыз ету де дер кезінде қолға алынып, тиісті заң қабылданды. Бұл заңның талқыланып келе жатқанына сегіз жылға жуықтады. Оның ішінде, мысалы, денсаулыққа қасақана жеңіл зиян келтіру, ұрып-соғу баптары криминализацияланды. Осы заңның арқасында қоғамда заң және тәртіп қағидаты реттеліп, жұмыс істей бастады. Кейінгі жылдары балалар арасындағы буллинг, бір-бірін аяусыз ұру сынды келеңсіздіктер кең етек алып кетті. Адамгершілік құндылықтар құрдымға кетіп бара жатқаны байқалады. Сол себепті ел жастарын тәртіпке бағындырып, тезге салатын бір құжаттың қабылданатын кезі келді. Одан бөлек Әкімшілік құқық бұзушылық кодексіне де өзгерістер енгізіліп, буллингке қарсы шаралар қолға алынып, тиісті жауапкершілік қарастырылды", -дейді Ж. Сүлейменова.
Оның үстіне есірткі айналымы, вейптердің ашық сатылымы сынды өзекті мәселелер де күн тәртібінен түспей кетті. Бұдан былай осы зиянды заттардың жарнамасына тыйым салу арнайы заңмен реттелмек екенін айтқан депутат өткен отырыстарға көз жүгіртсек, құрылтайда көтерілген мәселелерді негізге ала отырып, 10 заң жобасына бастамашылық жасалып, 9 заң қабылданды деп отыр.
"Ал Ұлттық құрылтайдың Бурабайда өткен төртінші отырысында да Мемлекет басшысы Қасым-Жомарт Тоқаев ел назарындағы түйткілді мәселелерді қаузап, тиісті тапсырмаларын берді. Президент биылғы Жұмысшы мамандықтары жылының маңызы жайлы да аз айтпады. Жасыратын несі бар, біз еңбек адамы жайлы көп айтпайтын болғанбыз. Бұл тұрғыдағы насихатқа соңғы үш жылда ғана мойын бұра бастадық. Біздің қоғамның кейбір мүшелері көшені, ауланы ластап жатып мұны ертең кім жинайды деген мәселеге бас қатырмайтын болған. Құдды бір бәрі өз-өзімен тазалана қалатын сияқты бізге. Сол ауыр жұмыстың артында қаншама адамның маңдай тері, адал еңбегінің жатыр.
Қасым-Жомарт Кемелұлының бастама көтеруімен жарияланған Жұмысшы мамандықтары жылы елдің игілігіне, дамуына аянбай еңбек сіңіріп жүрген қаншама қарапайым жанның дәрежесін көтере түседі деген сенімдеміз.
Екіншіден, Мемлекет басшысы шалғайдағы, шекарадағы ауылдар мәселесіне де назар аударып отыр. Бұл ретте біз «Дипломмен – ауылға» бағдарламасын жаңартып, ауылға аттанған мамандардың материалдық жағдайын көтеру мәселесін де талай мінберде айттық.
Үшіншіден, кітап оқу жайы да алаңдатады. Кейінгі үш жылда кітапханашы мамандарды даярлау, жалпы, кітап оқу бастамасын жиі-жиі көтеріп жүрміз. Мемлекет басшысы да бұған көңіл бөлді", -деп сөзін түйіндеді депутат Сүлейменова.
869 рет оқылды
